Ерөнхийлөгч Ц.Элбэгдорж: “Насантогтох багшийн 10 олимпийн мөчлөг 40 гаруй жилийн турш их спортод зүтгэсэн амжилт нь үнэхээр хосгүй юм”
Монголын Тулгар төрийн 2220 жилийн ой, Их Монгол Улсын 805 жилийн ой, Үндэсний эрх чөлөөний хувьсгалын 100 жилийн ой, Ардын хувьсгалын 90 жил хийгээд Үндэсний Их баяр наадмыг тохиолдуулан Олимп, дэлхийн аварга болон олон улсын тэмцээнүүдэд Монгол Улсын самбо жудо бөхийн үндэсний шигшээ багийн тамирчдыг дасгалжуулан онцгой амжилт гаргаж, Монгол Улсын нэр хүндийг дэлхий дахинд таниулахад оруулсан онцгой хувь нэмрийг нь өндрөөр үнэлж Монгол Улсын ардын багш, Гавъяат дасгалжуулагч Монгол Улсын үндэсний шигшээ багийн дасгалжуулагч Чимэдбазарын Насантогтоход Монгол Улсын Ерөнхийлөгч Хөдөлмөрийн баатар цол хүртээж, Алтан соёмбо тэмдэг, Сүхбаатарын одонгоор шагнав.
Мөн түүхэн ойнууд давхацсан энэ жилийн Үндэсний Их баяр наадмыг тохиолдуулан Монгол орны нийгэм эдийн засаг, урлаг спорт, боловсол, соёл, эрүүл мэнд, аж үйлдвэр, шинжлэх ухаан, хууль эрх зүй, газар тариалангийн болон бусад салбарт олон жил үр бүтээлтэй ажиллаж ирсэн дараах нэр бүхий хүмүүст Монгол Улсын Гавъяат цол хүртээв.
Гавъяат багш цолоор Сүхбаатар дүүргийн иргэн, ахмад багш Уртнасангийн Дэмбэрэлнямбууг, Гавъяат нисгэгч цолоор Боинг 737-800 агаарын хөлгийн дарга, нисэгч Гунгаагийн Жаргалсайханыг, Гавъяат тамирчин цолоор “Монголия экспедешн” ХХК-ийн аялал жуулчлалын менежер Бадамгаравын Гангаамаа, Зуун буудалт даамны их мастер Дөлийн Эрдэнэбилэг нарыг, Гавъяат эдийн засагч цолоор Монгол банкны дэд ерөнхийлөгч Найдансүрэнгийн Золжаргалыг, Хүний гавъяат эмч цолоор Говь-Алтай аймгийн нэгдсэн эмнэлгийн хүүхдийн эмч Дампилын Түмхүүг, Аж үйлдвэрийн гавъяат ажилтан цолоор ДЦС-3 ТӨХК-ийн ерөнхий инженер Бат-Очирын Ганбаатарыг, Гавъяат жүжигчин цолоор Улсын дуурь бүжгийн эрдмийн театрын гоцлол дуучин Энхбатын Амартүвшин, Х-Түц нэгдлийн жүжигчин Луушааны Баттулга, Сүхбаатар аймгийн хөгжимт жүжгийн театрын найруулагч Луузангийн Гомбосүрэн, УДЭТ-ийн жүжигчин Жамсранжавын Оюундарь, Монголын үндэсний циркийн дасгалжуулагч багш, хүч тамирын үзүүлбэрийн ахмад багш Гончигийн Хишигдаваа нарыг, Урлагийн гавъяат зүтгэлтэн цолоор Улсын филармонийн дарга Чангаагийн Даваасүрэн, хөгжмийн зохиолч Балчинжавын Долгион, хөгжмийн зохиолч Лодойдамбын Насанбат нарыг, Соёлын гавъяат зүтгэлтэн цолоор “Монголын шагайн харвааны холбоо” ТББ-ын Ерөнхий нарийн бичгийн дарга Должидын Басхүү, МҮОНРТ-ийн нэвтрүүлэгч Доржийн Билгээ нарыг, Байгаль орчны гавъяат ажилтан цолоор БОАЖЯ-ны ховор ан амьтны үндэсний комиссын дарга Очирын Доржраа нарыг тус тус шагнав.
Мөн Хөдөлмөрийн гавъяаны улаан тугийн одонгоор Сэлэнгэ аймгийн Сүхбаатар сумын өндөр настан, зөвлөх эмч Осорын Бадам, ХХААХҮ-ийн дэд сайд Жанамханы Саулей, “Нараналта” компанийн зөвлөх Очирын Чимэд, Завхан аймгийн Боловсрол соёлын газрын мэргэжилтэн, морин хуурийн багш Юндэнгийн Дэлгэрнасан нарыг, Цэргийн гавъяаны улаан тугийн одонгоор Батлан хамгаалах удирдлагын академийн багш, хурандаа Норовын Наранжамц, Агаарын довтолгооноос хамгаалах цэргийн командлалын ОУХ-ийн ахлах мэргэжилтэн, дэд хурандаа Ургамалын Дэмбэрэл нарыг, Алтан гадас одонгоор ЭНЭШТ-ийн төрөх тасгийн сувилагч Магсаржавын Алтантал, БСШУЯ-ны Ерөнхий боловсролын газрын дарга Доржсамбуугийн Эрдэнэчимэг нарыг, Цэргийн гавъяаны одонгоор ТТХГ-ын Харуул хамгаалалтын албаны дэд ажилтан, ахлах ахлагч Цэдэвсүрэнгийн Жамъяндоржийг, Хөдөлмөрийн хүндэт медалиар Харилцаа холбооны зохицуулах хорооны шуудангийн албаны ахлах мэргэжилтэн Юмжав Баярсайхан, ТЗҮААЭГ-ын үйлчлэгч Үүрцайхын Лхагважав нарыг, Цэргийн хүндэт медалиар ОБЕГ-ын харъяа аврах тусгай ангид шүхэрчин гал сөнөөгч Дэчингийн Зууннаст нарыг тус тус шагнав.
Шагнал гардуулсны дараа Монгол Улсын Ерөнхийлөгч Цахиагийн Элбэгдорж баяр хүргэж үг хэлэхдээ, “Их түүхт ойнууд, энэ сайхан өнөтэй зун, Үндэснийхээ их баяр наадмын өмнө төр түмнээрээ гавъяа зүтгэлээ үнэлүүлж байгаа нийт хүмүүс, тэдгээрийн эрхэм төлөөлөл болсон Та бүхэнд чин сэтгэлийн талархал илэрхийлье.
Өнөөдрийн шагнагдагсдын дотроос Үндэсний шигшээ багийн дасгалжуулагч Чимэдбазарын Насантогтох багшийн 10 олимпийн мөчлөг 40 гаруй жилийн турш их спортод зүтгэсэн амжилт нь үнэхээр хосгүй юм. Жү-догийн төрлөөр дэлхийн аваргын манай анхны мөнгө, хүрэл, алтан медальтнуудыг та дасгалжуулжээ. Олимпоос таны шавь нар Монголдоо анхны хүрэл, мөнгө, алтан медалийг авч ирсэн. Их спортоос төрсөн манай 3 хөдөлмөрийн баатар, 30 гаруй гавъяатыг та мөн дасгалжуулж алдар хүндийн замд хөтөлжээ. Таны болон таны шавь нарын цаашдын олон амжилтыг Монголын ард түмэн, төр хүлээж байгааг нэмж хэлье.
Дэлхийн дээвэрт хүрсэн манай Гангаамаагийн амжилт бол монголчуудын оргил амжилтуудын нэг яах аргагүй мөн. Дампилын Түмхүү гэж Говь-алтай аймагт хүүхдийн сэхээн амьдруулах тасагт 41 жил ажиллаж байгаа бурхан эмч гавъяагаа үнэлүүллээ. Манай нэрт эдийн засагч Найдансүрэнгийн Золжаргал Монгол Улс эдийн засгийн шинэ тогтолцоонд шилжихэд түүчээ нь болж явсныг энд дурдах хэрэгтэй. Дуурийн гоцлол дуучин Энхбатын Амартүвшингийн Чайковскийн наадамд үзүүлсэн амжилт аргагүй бахархууштай юм. 24 насандаа гардсан энэ амжилт олон сайхан алдар хүндийг дагуулна гэж итгэж байна. Циркийн ахмад зүтгэлтэн Хишигдаваа, олон улсын мастер Эрдэнэбилэг, удам залгасан шилдэг нисэгч Жаргалсайхан, мөн манай олон салбарын ахмадууд, урлаг соёлын ахмад, ирээдүйтэй зүтгэлтнүүд, нийгэм, төрийн олон салбарын алдартнууд гавъяа зүтгэлээ төрөөрөө үнэлүүллээ.
Энэ жил олон түүхт ой давхцаж, олон аймаг, салбарууд тэгш ойгоо тэмдэглэж газар бүр алдартан сайчуудаа тодруулж байгаа юм. Төрийн эрхэм дээд шагналаар ч төлөөлөн олон хүн шагнагдаж байгаа. Тэр бүх хүмүүс, хамт олонд төр түмнийхээ өмнөөс чин сэтгэлийн баяр хүргэж улам өндөр амжилтыг хүсэн ерөөе. Та бүхэн сайхан наадаарай” хэмээв.
