Монгол Улсын Ерөнхийлөгч Ц.Элбэгдорж өнөөдөр Литва Улсын Ерөнхийлөгч Далиа Грибаускайте болон тус улсын Ерөнхий сайд Андриус Кубилиустай уулзлаа. Одоогоос 20 жилийн өмнө Монгол Улс, Литва Улсын хооронд дипломат харилцаа тогтоосон нь найрсаг харилцааны эхлэлийг тавьсан бөгөөд харилцаа хамтын ажиллагаа гол төлөв улс төрийн хүрээнд явагдаж байна.
Хоёр улсын Ерөнхийлөгч Ардчилсан орнуудын хамтын нийгэмлэгийг тэргүүлж байсан, тэргүүлэх гэж байгаа орнуудын Төрийн тэргүүнүүдийн хувьд энэ байгууллагын үйл ажиллагааг идэвхжүүлэх чиглэлээр санал солилцон, туршлага солилцов.
Ерөнхий сайд А.Кубилиустай хоёр орны харилцаа хамтын ажиллагааг хөгжүүлэх чиглэлээр ярилцаж, санал солилцсон.
Ерөнхийлөгч Ц.Элбэгдорж “Монгол Улс, Европын Холбооны хооронд “Түншлэл, хамтын ажиллагааны хэлэлцээр”-т гарын үсэг зурахаар төлөвлөж байгаа. Энэхүү хэлэлцээрийг Европарламент батлахад Литва Улсын зүгээс дэмжлэг үзүүлнэ гэдэгт итгэж байна. Манай улс европын стандартыг өөрийн улсдаа нэвтрүүлэх чиглэлээр багагүй хүчин чармайлт гаргаж байгаа бөгөөд энэ чиглэлээр танай улсаас туршлага судлахыг бид хүсч байна.
Бид, Монгол-Литва улсуудын хооронд зам тээврийн чиглэлээр хамтын ажиллагаа хөгжүүлэх боломжтой гэж үздэг. Худалдаа эдийн засгийн харилцааг идэвхжүүлэх, худалдааны танхимуудын хооронд холбоо тогтоох, хамтын ажиллагааны гэрээ хэлцлүүдийг байгуулах, бизнес эрхлэгчдэд зориулсан арга хэмжээнүүдийг зохион байгуулах саналтай байна.
Түүнчлэн боловсрол, шинжлэх ухааны салбарт хамтын ажиллагааг идэвхжүүлж, танай улсад оюутан сургахад дэмжлэг үзүүлэхийг хүсч байна” гэлээ.
Литва Улсын Ерөнхий сайд А.Кубилиус , Ардчилсан орнуудын хамтын нийгэмлэгийг тэргүүлэх болсонд нь Ерөнхийлөгч Ц.Элбэгдоржид баяр хүргээд, хоёр орны харилцааг хөгжүүлэх чиглэлээр яригдсан асуудлуудтай санал нэгтэй байгаагаа илэрхийлэв.
Ерөнхийлөгч Ц.Элбэгдорж, Литва Улсын Ерөнхийлөгчийг болон Ерөнхий сайдыг Монгол Улсад айлчлахыг урилаа.
