Литва Улсын Вильнус хотноо дэлхийн ардчиллын цугларалт болж байна. Дэлхийн янз бүрийн орны Төр засгийн тэргүүн, сайд нар, ардчиллын лидерүүд, шийдвэр гаргагчид, ардчиллыг бэхжүүлэхийн төлөө ажилладаг олон улсын байгууллагуудын удирдлага, гишүүд зэрэг нийт мянга орчим төлөөлөл Ардчилсан орнуудын хамтын нийгэмлэг (АОХН)-ийн Сайд нарын ээлжит бага хуралд оролцож байна. Тэдгээрийн 40 нь Төр засгийн тэргүүн, сайд нар байна.
Монгол Улсын Ерөнхийлөгч Ц.Элбэгдорж энэхүү бага хуралд Литва Улсын Ерөнхийлөгчийн урилгаар оролцож байна. Тэрээр өнөөдөр АОХН-ийн “Дэлхийг уриалсан эмэгтэйчүүд: боловсролтой, чадварлаг, эн тэнцүү” сэдэвт өндөр түвшний хэлэлцүүлэгт оролцож, “Эмэгтэйчүүдийн эдийн засгийн бие даасан байдал” сэдэвт хуралдаан дээр үг хэллээ. Монгол эмэгтэйчүүдийн түүхэнд гүйцэтгэж ирсэн болон одоо гүйцэтгэж буй үүргийн талаар ярьсан Ерөнхийлөгчийн яриа хуралдаанд оролцсон олон эмэгтэйчүүдийн анхаарлыг татаж, асуулт хариулт өрнөж байв.
Ардчилал нь, эмэгтэйчүүдийн эдийн засаг, хууль эрхзүйн байдлыг баталгаажуулахгүйгээр амжилт олохгүй юм гэсэн ерөнхий санааг агуулсан энэ хуралдаанд Монгол Улсын Ерөнхийлөгчөөс гадна, Словакийн Ерөнхий сайд Ивета Радичова, Латви Улсын Парламентын дарга Солвита Аболтина нар мөн үг хэлсэн юм.
Ардчилсан орнуудын хамтын нийгэмлэгийг 2 жилээр даргалдаг бөгөөд Литва Улс энэхүү үүргээ амжилттай гүйцэтгээд одоо үүргээ Монгол Улсад албан ёсоор шилжүүлэн өгөх гэж байна.
АОХН-ийн удирдах байгууллага болох Зөвлөлдөх бүлгийг тэргүүлж буй улс ээлжит бага хурлыг өөрийн оронд зохион байгуулдаг. Зөвлөлдөх бүлэгт АНУ, БНСУ, Кабо- Верде, Итали, Литва, Мали, Мексик, Монгол, Морокко, Өмнөд Африк, Польш, Португал, Филиппин, Чех, Чили, Эль Салвадор, Энэтхэг улсууд багтдаг.
Ардчиллыг бэхжүүлж, улс орнуудын нэгдмэл байр суурийг нэгтгэхийн төлөөх санаачилга биеллээ олж улам бүр хүчирхэгжсээр өнөөдөр 150 гаруй гишүүн орнуудыг нэгтгэсэн томоохон байгууллага болон бэхэжжээ.
Энэ жилийн ээлжит хуралдаанаа ”Эрчтэй, Идэвхтэй, Нээлттэй” уриан дор зохион байгуулж байна.
Энэ удаагийн хурлын үеэр эмэгтэйчүүдийн асуудлаарх өндөр түвшний хэлэлцүүлгээс гадна парламентын, төрийн бус байгууллагуудын, бизнесийн, ардчиллын, залуу удирдагчдын салбар хуралдаанууд болно.
