Монгол Улсын Ерөнхийлөгч Ц.Элбэгдорж Украин Улсын Ерөнхийлөгч В.Януковичийн урилгаар 2011 оны 6 дугаар сарын 26-29-нд тус улсад төрийн айлчлал хийнэ. Айлчлалын явцад Украин Улсын төр, засгийн болон парламентын удирдлагуудтай яриа хэлэлцээ хийж, айлчлалын дүнгээр Монгол, Украины түншлэлийн харилцааг хөгжүүлэх тухай хамтарсан мэдэгдэл гарган, хоёр орны хамтын ажиллагааг өргөжүүлэхэд чиглэсэн хэд хэдэн гэрээ, хэлэлцээр байгуулах юм.
Ерөнхийлөгч Ц.Элбэгдорж Украин Улсын Львов мужид зочилно.
Мөн Ерөнхийлөгч Литва Улсын нийслэл Вильнус хотноо Ардчилсан орнуудын хамтын нийгэмлэг /АОХН/-ийн бага хуралд оролцох бөгөөд Монгол Улс нь 2011-2013 оны хооронд тус нийгэмлэгийн Зохицуулах бүлгийн даргаар ажиллахаар болсон байна.
Энэ нь ардчилал, түүний зарчим, чөлөөт болон шударга сонгууль, хүний эрх, эрх чөлөөг эрхэмлэгч Монгол, АНУ, Итали, Польш, Португал, Энэтхэг зэрэг 17 орныг зөвлөлдөх бүлэгтээ багтаасан томоохон нийгэмлэг юм.
