Өнөөдөр Монгол Улсын Ерөнхийлөгч Ц.Элбэгдорж, Улаанбаатар хотноо зохиогдож буй сонгодог урлагийн “Бүжгийн жүжгийн үдэш”наадамд оролцохоор хүрэлцэн ирсэн дэлхийн шилдэг бүжигчдийг хүлээн авч уулзлаа. Монгол Улсын Гавьяат жүжигчин Д.Алтанхуягийн санаачилгаар болж буй энэхүү наадамд дэлхийн өнцөг булан бүрээс цугласан 10 шилдэг балетын жүжигчид оролцож байна. АНУ-ын “Бостон Балет”-ын гоцлол бүжигчин , Ла Скала болон Японы “Комаки Балет”-ын хүндэт бүжигчин Д.Алтанхуяг продюсерээр нь ажиллаж, АНУ-ын Нью Энгланд Консерваторийн ахлах зөвлөх, “Бостон Балет”-ын хөгжмийн удирдаач, АНУ-ын Эль Система байгууллагын захирал, мэргэжлийн симфони найрал хөгжмийн удирдаач Марк Черчелийн удирдлаган дор Карлос Молина (Колумб болон Америкийн балетын театрын гоцлол бүжигчин, Колумб улсын иргэн), Эрика Корнехо (“Бостон Балет”-ын гоцлол бүжигчин, Аргентин Улсын иргэн), Родриго Алмаралес (АНУ-ын Синсинати Балетын театрын гоцлол бүжигчин, Куба Улсын иргэн), Миса Куранага (“Бостон Балет”-ын гоцлол бүжигчин, Нью Йорк хотын Үндэсний төв театрын хүндэт бүжигчин, Япон Улсын иргэн), Андилье Ндлову (Вашингтон балетын театрын гоцлол бүжигчин, ӨАБНУ-ын иргэн), Уитни Женсон (“Бостон Балет”-ын гоцлол бүжигчин ,АНУ-ын иргэн), Ят Сен Чанг (Английн Үндэсний балетын театрын гоцлол бүжигчин, Куба Улсын иргэн), Кристал Коста (Английн Үндэсний балетын театрын гоцлол бүжигчин, Канад Улсын Иргэн), Рие Ичикава (“Бостон Балет”-ын гоцлол бүжигчин, Япон Улсын иргэн), Жон Лайм (“Бостон Балет”-ын гоцлол бүжигчин, АНУ-ын иргэн) нарын тоглолт энэ өдрүүдэд монголын үзэгчдийг бишрүүлж байгаа билээ.
Ерөнхийлөгч Ц.Элбэгдорж хэлэхдээ “Монголын үзэгчдэд дэлхийн сонгодог урлагийг эх орондоо үзэх, эх орныхоо сонгодог урлагийн хөгжлийн түвшинг харьцуулан үнэлэх, монголын сонгодог урлагийг дэлхийд таниулах сайхан боломж олгож байгаа энэхүү тоглолтыг санаачилсан Д.Алтанхуягт болон манай оронд хүрэлцэн ирсэн шилдэг бүжигчид та бүхэнд талархаж байна. Монгол Улсын түүхэнд төр улсаа удирдаж байсан хүмүүс бүх урлагийг дэмжиж ирсэн. Одоо ч урлагийг дэмжих бодлого хэрэгжиж байна. Монголд сонгодог урлаг үүссэн цагаас хойш өнөөдрийг хүртэл төрийн ивээлд хөгжиж ирлээ. Манай улсад урлаг соёлын өнгө бүрийг харж болно.
Нүүдэлчин монголчууд, нүүдлийн соёл урлагаа хадгалахын зэрэгцээ, сонгодог урлагийг ч сайн хөгжүүлж байгаагийн жишээ бол дэлхийн шилдэг театруудад бүжиглэж, дуулж байгаа манай сонгодог урлагийн төлөөлөл, тухайлбал Д.Алтанхуяг юм. Хүн төрөлхтөний соёлын өв болсон сонгодог урлагийн гайхамшигаас тээж авчирсан Та бүхэнд баярлалаа” гэв. Ноён Марк Черчель “ Ийм гайхамшигтай санаа гаргасан, энэ бүх үйл ажиллагааны ерөнхий зохицуулагч хийж байгаа Д.Алтанхуягтаа бид ч мөн талархаж байгаа. Д.Алтанхуяг бол монголын сонгодог урлагийн Элчин сайд гэсэн үг. Монголын үзэгчид биднийг маш сайхан хүлээж авч байна. Таны хэлсэнээр монголчуудын урлагийн мэдрэмж, урлагийн янз бүрийн өнгө биднийг алмайрууллаа” гэлээ.
Бүжигчид сэтгэл хангалуун байгаагаа илэн далангүй илэрхийлж, монголын сонгодог урлаг, монгол үзэгч, монгол ахуйн талаар сэтгэгдлээ хэлж байв.
