1916 оноос эхлэн АНУ-ын Засгийн газрын үйл ажиллагааг судлан, бодлогын зөвлөгөө, дүгнэлт өгөх зорилго бүхий “Brookings”-ын хүрээлэн байгуулагджээ. АНУ-ын Ерөнхийлөгч агсан Т.Рузвельт тус хүрээлэнгээр эдийн засгийн хямралын шалтгааныг судалж, дүгнэлт гаргах захиалга өгч байсан байна. Дайны дараа “Brookings”-ын хүрээлэн зөвхөн эдийн засаг, Засгын газрын бодлогын үйл ажиллагааг судлаад зогсохгүй, олон улсын байдал, харилцааны асуудлыг судлах болж Форд, Рокфеллерын сангуудаас дэмжлэг авах болжээ.
1957 оноос судалгааны хүрээ улам нэмэгдэж олон улсын төсөв санхүүтэй холбоотой томоохон судалгаануудыг захиалгаар хийх болж, улмаар 2002 онд Ойрхи Дорнод судлал болон Хятад судлалын төвүүдийг нээжээ.
Одоогоор тус хүрээлэн эдийн засаг, гадаад бодлого, засгийн газрын үйл ажиллагаа, дэлхийн бодлого, томоохон хотуудын төлөвлөлт, бодлогын асуудлыг голчлон судалж байна.
“Brookings” нь олон улсын нэр хүндтэй улстөрчид, эдийн засагчид, зохиолч, судлаачдыг урьж лекц зохион байгуулдаг уламжлалтай бөгөөд энэ удаад Монгол Улсын Ерөнхийлөгч Ц.Элбэгдорж ардчилал, хүний эрхийн сэдвээр лекц уншив.
Хүрээлэнгийн Ерөнхийлөгч С.Талбот, лекцийн эхэнд танилцуулахдаа “ Бид өнөөдөр Монгол Улсын Ерөнхийлөгчийг зөвхөн улсын Ерөнхийлөгч гэдгээр нь биш хийж байгаа үйл ажиллагааг нь анхаарал татахгүй байхын аргагүй лидер хүн гэдэг утгаар нь урилаа. Монгол Улс нэгэн цагт дэлхийн хамгийн том хүчирхэг гүрэн байсан гэдгийг та бүхэн мэднэ. Гэхдээ хамгийн анхны хуультай, глобальчлагдсан гүрэн байсан талаар хүмүүсийн тэр бүр мэдэхгүй олон “нууц” бий” хэмээн хэлсэн юм.
Энэ өдөр хүрэлцэн ирсэн улстөрчид, судлаачид, эрдэмтэн профессорууд монголчуудын байгуулсан их гүрний онцлог, өнөөгийн Монгол Улсын ардчиллыг бэхжүүлж байгаа арга зам, гадаад бодлого, бүс нутаг олон улсын хамтын ажиллагааны байгууллагуудын хүрээнд Монгол Улсын гүйцэтгэж байгаа үүргийн талаар асуулт асууж ярилцлаа.
Америкийн гадаад бодлогыг тодорхойлогч эрхэмүүдийн анхаарлыг татсан өөр нэгэн лекц бол АНУ –ын гадаад харилцааны зөвлөлөөс зохион байгуулсан лекц байлаа.
Ерөнхийлөгч Ц.Элбэгдоржийн энэ лекцэд Америкийн өнцөг булан бүрээс бодлогын зөвлөгчдийн төлөөлөл ирсэн тухай тус хүрээлэнгийн удирдлага лекцийн эхэнд онцолж байв.Энэ лекцэнд АНУ-ын Засгийн газарт гадаад бодлогын чиглэлээр зөвлөдөг өндөр алба хашиж байсан улстөрчид, элчин сайдууд, нэр хүнд бүхий их дээд сургуулиудын эрдэмтэд судлаачид гээд 150 гаруй хүн ирсэн байсан юм.
Тэд, Монгол Улсаас хоёр хөрш, болон гуравдагч хөрш рүү, бусад улс орнууд руу чиглэсэн бодлогын асуудлуудыг голчлон сонирхож байв.
