ШАНХАЙН ХАМТЫН АЖИЛЛАГААНЫ БАЙГУУЛЛАГЫН 10 ЖИЛИЙН ОЙД ЗОРИУЛСАН ДЭЭД ТҮВШНИЙ УУЛЗАЛТАД ОРОЛЦОГЧДОД
Астана
Бүгд Найрамдах Казахстан Улсын Ерөнхийлөгч Эрхэмсэг ноён Нурсултан Абишевич Назарбаев,
Шанхайн хамтын ажиллагааны байгууллагын гишүүн, ажиглагч орнуудын төрийн тэргүүн нар аа,
Хуралдаанд оролцож буй хүндэт зочид оо, Хатагтай, ноёд оо,
Та бүхэнд Шанхайн хамтын ажиллагааны байгууллагын 10 жилийн ойн халуун баяр хүргэж, хуралдаан амжилттай болохыг хүсэн ерөөе.
Монгол Улс Төв Азийн бүс нутагт өрнөж буй улс төр, эдийн засгийн хамтын үйл явцад хамрагдахыг эрмэлздэг бөгөөд ШХАБ-ыг тус бүс нутгийн олон талт хамтын ажиллагаанд оролцох нэг чухал суваг гэж үзэн тус байгууллагад ажиглагчийн статустай болсон билээ.
Өнгөрсөн 10 жилийн хугацаанд ШХАБ-ын үйл ажиллагааны цар хүрээ тэлж, хамтын ажиллагааны механизм улам бүр боловсронгуй болж, хууль эрх зүйн үндэс бэхжин байгууллагын олон улсын нэр хүнд өсч ирлээ. ШХАБ ийнхүү бүс нутгийн үйл хэрэгт чухал үүрэг бүхий олон улсын байгууллага болон төлөвшиж буйд ажиглагч орны хувьд Монгол Улс баяртай байдаг.
ШХАБ хоёр дахь арван жилдээ илүү бодит, үр ашигтай хамтын ажиллагааны үед шилжин орж, олон улсын үйл хэрэгт илүү үр бүтээлч үүрэг гүйцэтгэнэ гэдэгт би итгэлтэй байна. 10 жилийн ойг тэмдэглэх хүрээнд явагдсан олон арга хэмжээний үеэр байгууллагын хөгжлийн явцыг дүгнэж, ирэх жилүүдийн хөгжлийн чиг хандлагыг тодорхойлоход тустай олон чухал санал, санаачилгыг дэвшүүлснийг бид анхааралдаа авсан. Астанагийн дээд түвшний уулзалтаас гаргах баримт бичгүүдэд ШХАБ-ын цаашдын хөгжлийн төлвийг тодорхойлсон чухал чиглэл, шийдвэрүүдийг гаргах нь гишүүн болон ажиглагч орнуудын хамтын ажиллагааг илүү бодитой хэлбэрт оруулах, хамтын ажиллагааны үр ашгийг дээшлүүлэхэд чухал түлхэц болно гэж найдаж байна.
Манай улс ШХАБ-ын хүрээн дэх дэд бүтэц, эрчим хүч, хөдөө аж ахуй зэрэг эдийн засгийн салбарын хамтын ажиллагаанд түлхүү ач холбогдол өгч байдаг бөгөөд боловсрол, соёл, шинжлэх ухаан, эрүүл мэнд, байгаль орчин, гамшигтай тэмцэх чиглэлийн үйл ажиллагаанд идэвхтэй оролцох сонирхолтой байдаг билээ.
Гишүүн орнуудын зүгээс Онцгой байдлын үр дагаврыг арилгах, урьдчилан сэргийлэх ШХАБ-ын төв байгуулах, Умард-Өмнөд, Ази-Европын хоорондын эх газрын тээврийн коридор нээх, ШХАБ-ын хүнсний аюулгүй байдлын хамтын ажиллагааны механизм байгуулах зэрэг тодорхой санал дэвшүүлж, хэрэгжүүлэхээр ажиллаж буйд монголын тал онцгой анхаарал хандуулж, эдгээрийн хэрэгжилтэд зохистой хэлбэрээр оролцох сонирхолтой байна. Хятадын талаас 2011-2012 оныг ШХАБ-ын сайн хөршийн найрсаг харилцааны жил болгон зарлах санал дэвшүүлж буйг талархан дэмжиж байна.
Монгол Улс харилцан ашигтай байх зарчмын үндсэн дээр ШХАБ-ын үйл ажиллагаан дахь оролцоогоо өргөжүүлэн хөгжүүлэх бодлогоо цаашид ч баримтлах болно. Түүнчлэн Монгол Улс ШХАБ-ын гишүүн, ажиглагч, яриа хэлэлцээний түнш орнуудтай хоёр талын харилцаа, хамтын ажиллагаагаа өргөжүүлэн хөгжүүлэх эрмэлзэл төгс байна.
Ойн жилд ШХАБ-ыг тэргүүлж байгаа Казахстаны талын чадварлаг зохион байгуулалт, тус байгууллагын гишүүн, ажиглагч, яриа хэлцээний түнш орнуудын хамтын хүч чармайлтын үрээр байгууллагын 10 жилийн ой, түүний дотор ойн хамгийн чухал арга хэмжээ болох Астанагийн дээд түвшний уулзалт амжилттай болж, байгууллагын цаашдын хөгжилд чухал хувь нэмэр оруулна гэдэгт итгэл төгс байгаагаа тэмдэглэе.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
Улаанбаатар хот
2011 оны 06 дугаар сарын 15
