Өнөөдөр 12 цагт Монгол Улсын Ерөнхийлөгч Ц.Элбэгдорж Улс төрийн хилс хэрэгт хэлмэгдэгсдийг хүндэтгэн дурсгалын хөшөөнд цэцэг өргөлөө.
Тус арга хэмжээнд УИХ-ын дарга, УИХ, Засгийн газрын гишүүд, ҮХЦ-ийн дарга, Дээд шүүхийн Ерөнхий шүүгч, Улсын Ерөнхий прокурор, Ерөнхийлөгчийн Тамгын газрын дарга, ЗГХЭГ-ын дарга, Цагаатгах ажлыг удирдан зохион байгуулах комиссын нарийн бичгийн дарга, гишүүд, холбогдох яамд, Нийслэлийн удирдлага, УИХ-д суудалтай намуудын төлөөлөл, Монголын Ахмадын холбоо болон хэлмэгдэгсдийн төрөл төрөгсөд оролцоо.
Цэцэг өргөх ёслолд оролцсоныхоо дараа Монгол Улсын Ерөнхийлөгч сэтгүүлчдийн асуултанд хариулсан юм. Тэрээр: “Өнөөдөр улстөрийн хилс хэрэгт хэлмэгдэгсдийн дурсгалыг хүндэтгэх өдөр. Хэлмэгдэгсдийн дурсгалыг 1996 оноос тэмдэглэж ирсэн бөгөөд тэр цагаас монголын төр засаг ард түмнээсээ албан ёсоор уучлал гуйсан байдаг. Ингэж л тэр үеэс хэлмэгдэгсдэд зориулсан хөшөө, музей бий болж, хэлмэгдсэн хүмүүсийн ар гэрт нөхөн олговор олгох болсон юм.
Бид зөвхөн нэг өдөр л дурсах биш, цаашид монголын төр засгийн бүх байгууллага, бүх түвшиндээ иргэдийнхээ эрхийг өдөр бүр хүндэтгэж ажилладаг байх учиртай. Их хэлмэгдүүлэлтийн шуурганд нийгмийн бүхий л давхаргынхан өртсөн байдаг. Тэр хүмүүс эх орноо гэсэн сэтгэлтэй, үнэхээр эх орончид тэмцэгчид байсныг дурсан хэлэх нь зүйтэй” хэмээн онцлов.
Дараа нь сэтгүүлчдийн асуусан “Өнгөрсөн долдугаар сарын нэгний өдрийн үймээнийг зарим намын зүгээс улстөрийн хэлмэгдүүлэлт байсан гэж дүгнэдэг. Та үүнд байр сууриа илэрхийлэхгүй юу? гэсэн асуултад Ерөнхийлөгч хариулахдаа: “Иргэдийнхээ эрхийг төр засаг нь ч, олон нийтийн байгууллага нь ч хүндэтгэж ажиллах нь эрхэм юм. Хэрвээ тэрхүү эрх нь зөрчигдсөн бол эргээд сэргээгддэг байх учиртай. Энэхүү асуудалд манай хууль хяналтын байгууллагууд анхаарал хандуулж ажиллах учиртай. Ер нь хүнээ хүн ёсоор үздэг байж л ардчилсан улс орон оршин тогтнодог. Тиймээс энэ асуудалд хамгийн чухлаар анхаарал тавьж ажиллах хэрэгтэй гэдгийг энэ өдөр хэлэх нь зүйтэй” гэлээ.
