ОХУ-ын Бүгд найрамдах Халимаг Улсад айлчлах үеэрээ Монгол Улсын Ерөнхийлөгч Ц.Элбэгдорж, түүнтэй уулзах гэсэн халимагийн өндөр настнууд, ахмадуудын хүсэлтийг хүлээн авч, тэдэнтэй товч уулзав. Ерөнхийлөгчтэй уулзаж амар мэнд мэдэхээр ирсэн ахмадуудын дунд, төрөлх хэл, ёс заншлаа хэвээр хадгалан үлдээж, ард түмэндээ өвлүүлэх үйлсэд бүх насаараа зүтгэсэн зохиолчид, багш нар, ерөөлч магтаалчид, удирдах алба хашч байсан хүмүүс олноороо ирсэн байлаа.
“Монгол Улсын Ерөнхийлөгч Та биднийг зорин ирж, хүндлэн золгож байгаа нь зүрхний баяр болж байна. Халимагчууд бид монгол түмний “тасарсан мах, үсэрсэн цус” гэдгээ хэзээ ч мартдаггүй. Бид хэл соёлоо хадгалан үлдээх талаар их зүйл хийж байгаа. Манай төр засгийн зүгээс ч анхаарч байдагт бид баярлаж байна. Өнөөдрийн таны энэхүү айлчлал манай Орос-Монгол улсын найрсаг харилцааг батжуулахад чухал үүрэгтэй айлчлал болоосой гэж хүсч байна” хэмээн ахмадууд хэллээ.
Дараа нь тэд Монгол Улсын Ерөнхийлөгчөөс сонирхсон асуултуудаа асууж, харилцан ярилцлаа.
Ерөнхийлөгч Ц.Элбэгдорж, улс орныхоо хөгжил цэцэглэлтийн төлөө , үр хойчийнхоо сайн сайхны төлөө хийж бүтээж, туурвиж хөдөлмөрлөсөн ахмадуудад эрүүл энх, сайн сайхныг хүслээ.
