Монгол Улсын Ерөнхийлөгч Ц.Элбэгдорж дагалдан яваа төлөөлөгчдийнхөө хамт зургадугаар сарын 2-нд тус улсын драмын театрт монгол, халимагийн уран бүтээлчдийн тоглолт үзлээ. Тоглолт үзэхэд Халимаг улсын тэргүүн, Засгийн газрын дарга нар хамт байв.
Тоглолтод халимагийн үндэсний бүжгийн “Тюльпан” хамтлаг, Монголын Улсын гавъяат жүжигчин Д.Сосорбарам, Г.Равдан, “Шуранхай”, “Overture”, “Хөсөгтөн” хамтлагийн дуучид, хөгжимчид, үндэсний бүжгийн “Эв эе” хамтлаг оролцлоо. Хамтарсан тоглолт үзсэн халимагийн ахмадууд, залуучууд сэтгэл хангалуун баяртай байгаа харагдав.
Тоглолтыг үзсэнийхээ дараа Монгол Улсын Ерөнхийлөгч Ц.Элбэгдорж үг хэлэхдээ “ Би гал голомтоо сахисан монгол түмнийхээ мэндийг дэвшүүлэхээр ирлээ. Та бүхний халуун сэтгэлийг мэдэрч байна. Дөрвөн зууны турш үндэсний хэл, соёлоо мартаагүй хадгалж ирсэнд баярлалаа. Та бүхний минь буян заяа дэлгэрч, урт удаан амьдарч үеийн үед хамтдаа байхын ерөөл дэвшүүлье” гэв.
