Монгол Улсын Ерөнхийлөгч Ц.Элбэгдорж Монгол судлаач нартай өгөөний цай уусныхаа дараа Петр хааны зуны ордон, эдлэнг үзэж, буддын шашны “Гүнзэчойнэй” дацанд зочлов. Ерөнхийлөгчийг дацангийн лам нар угтан авч хүндэт суудалд залан мандал өргөж, маань хөгжөөв. Дараа нь Ерөнхийлөгч дацанд бэлэг болгон бүтээлгэсэн бурхан багшаа өгч, лам хуврагуудад буян номын ажилд нь амжилт хүслээ.
Энэ сумийг Агваан Доржиев гэдэг хүн 1909 онд бариулсан бөгөөд Монголын наймдугаар богд мөнгө хөрөнгө гаргаж, ихээхэн сэтгэл зориулсан юм байна. Мөн 1914 онд чин ван Ханддорж ирж дэмжлэг үзүүлжээ. Гэвч хожим хэлмэгдэлд өртөж юу ч үгүй болсон аж. 1993 онд сэргээн бурхан багш бүтээж буян номын ажлаа эхлүүлжээ. Үүнд бас монголчууд ирж тусалсан аж. Буриад, халимаг лам нар ном уншдаг Монголын түүхтэй их холбоотой ийм нэгэн сүм Санкт-Петербургт буддын шашинтан олонд үйлчилдэг юм байна.
