Мэдээлэл, харилцаа холбооны Улсын зөвлөлгөөнд оролцогсдод
Та бүхэнд Монгол Улсад орчин цагийн мэдээлэл, шуудан, харилцаа холбооны салбар үүсч хөгжсөний 90 жилийн ойн баярын мэнд хүргэе. Энэ жил Монголын тулгар төрийн 2220, Их Монгол Улс байгуулагдсаны 805, тусгаар тогтнолоо сэргээн тогтоосон Үндэсний эрх чөлөөний хувьсгалын 100, Ардын Хувьсгалын 90 хийгээд Монгол Улс НҮБ-д нэгдэн орсны 50 жилийн түүхэн их ой тохиож буй билээ.
Уламжлал шинэчлэл, ухаарал сургамж дүүрэн Монгол түүхийн хүндэтгэлт ойнууд давхацсан жил танай салбар 90 жилийн ойгоо тэмдэглэж байгаа нь бэлэг дэмбэрэлтэй юм. Их ойнууд өнгөрсөн түүхийнхээ улбааг орчин цагийн хурдаар сэлбэн, ирээдүйдээ итгэл дүүрэн замнахад чухал түлхэц болно гэж бодож байна.
Монголчуудын дэлхийн цараатай их түүхийг цогцлоосон нууц нь мэдээллийн хурдаар ялалт амжилтаа хэмжиж өртөө улааны шуурхай албаар дамжуулан эзэнт гүрнээ удирдаж байсанд оршино. Чухамдаа хэн мэдээллийг чадварлагаар шуурхай эзэмшинэ, тэр бодит баялгийг давуутай бүтээдэг билээ.
Аливаа улс орны хүчирхэг байдлын нэгэн чухал үзүүлэлт нь мэдээлэл харилцаа холбооны хөгжлийн түвшин юм. Тэр ч утгаараа даяаршлын эрчимтэй нөлөөллийн эрин цагт дэлхий нийтийн харилцаа, улс үндэстнүүдийн харилцан хамаарал улам бүр тэгш боломжид суурилах нөхцөл бүрдэж байна. Энэ нь мэдээллийн асар хүчтэй өрсөлдөөнийг буй болгож мэдээлэл харилцааны бодит үнэ цэнийг улам бүр нэмэгдүүлсээр байна.
Миний бие энэхүү зөвлөлгөөнийг Монгол Улсын хөгжилд шинэ боломж нээхэд нэгэн чухал дэм үзүүлнэ гэж ойлгож байна. Учир нь өнөөдөр “зөөлөн дэд бүтэц”-ийн хөгжил, мэдлэгт тулгуурласан шинэ эдийн засаг бий болгох зорилт, технологийн ардчиллыг хөгжүүлэх, мэдээллийн аюулгүй байдлыг хангах зэрэг асуудал өөрөө хөгжлийн бодит хэмжүүр болж байгаа юм.
Энэ ч үүднээс мэдээлэл, харилцаа холбооны асуудлыг дэлхийн мэдээлэлжсэн нийгмийн чуулга уулзалт, Нэгдсэн үндэстний байгууллагын Мянганы хөгжлийн зорилтуудын талаарх бага хурлуудаар хэлэлцэн, улс орон бүр өөр өөрийн хөгжлийн бодлого, баримт бичгүүдэд тусган хэрэгжилтийг ханган ажиллаж байгаа билээ.
Монгол Улсын Их Хурлаар 2008 онд батлагдсан “Мянганы хөгжлийн зорилтод суурилсан Үндэсний хөгжлийн цогц бодлого”-д Мэдээлэл, харилцаа холбоо, технологи Монгол Улсын хөгжлийн гол хурдасгуурын нэг гэж тодорхойлон, мэдлэгт суурилсан нийгмийг байгуулах зорилтыг дэвшүүлсэн юм.
Миний бие өмнө нь Ерөнхий сайдаар ажиллаж байхдаа “Цахим Монгол хөтөлбөр”, цахим засаглалын стандартыг Монгол Улсад бий болгохын төлөө тодорхой зорилтуудыг дэвшүүлэн ажиллаж байсан. Учир нь цахим засаглал бол эдийн засагт хэмнэлттэй, авлигад өртдөггүй, иргэдийн тэгш эрхийн оролцоог хангаж чаддаг чанараараа хүний эрх, эрх чөлөөний эерэг боломжуудыг нийгэмд буй болгодог юм. Тийм ч учраас цаашид цахим хөгжлийн хурдыг нийгмийн хөгжлийн чухал хэсэг хэмээн үзэж энэ чиглэлд төрийн бодлого, хөрөнгө оруулалт чиглэж байх ёстой.
Саяхан 2011 оны 1 дүгээр сараас эхлэн шүүхийн шийдвэрүүдийг олны хүртээл болгож, цахим хаягт нь байрлуулсан нь шүүхийн үйл ажиллагаа иргэдийн өмнө нээлттэй байх эхлэлийг тавилаа.
Миний бие Монгол Улсын Ерөнхийлөгчийн бүрэн эрхийнхээ дагуу “Монгол Улсын Үндэсний аюулгүй байдлын үзэл баримтлал”-ыг шинэчлэн боловсруулах санаачилга гарган өнгөрсөн жил УИХ-аар батлуулсан. Энэ шинэ Үндэсний аюулгүй байдлын үзэл баримтлалд чухалчлан оруулсан Мэдээллийн аюулгүй байдлыг хангах асуудлыг цаашид харилцаа холбооны технологийн хөгжлийн бодлогодоо тусгаж, дэвшилтэт технологи нэвтрүүлэх зорилтоо эрчимжүүлэх ажилдаа мөрдлөг болгох шаардлагатай байна.
“Монголын хууль гурван хоногт” хэмээх ам дамжсан хэллэг байдаг. Түүх сөхвөл Монголын эзэнт гүрний үед хааны зарлиг, төрийн хууль нь гарсан даруйдаа гурван хоногийн дотор Эзэнт гүрний өнцөг булан бүрт хүрч үйлчлэх учиртайг өгүүлсэн үг аж. Энэ бол Монголчуудын мэдээллийн хурд ямархуу хурдтай түгж байсны гэрч юм.
Энэ удаагийн мэдээлэл, харилцаа холбооны Улсын зөвлөгөөн шийдлээ хүлээсэн олон тооны тулгамдсан асуудалд тодорхой хариу өгнө гэдэгт итгэж байна.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны 5 дугаар сарын 25
Төрийн ордон
Улаанбаатар хот
