"Монгол гэр бүл тулгамдсан асуудал ба шийдэл" анхдугаар хэлэлцүүлэг
Ерөнхийлөгчийн дэргэдэх “Иргэний танхим”-д “Монгол гэр бүл, тулгамдсан асуудлууд ба шийдэл” нээлттэй хэлэлцүүлэг өнөөдөр боллоо. Хэлэлцүүлэгт Улаанбаатар дээд сургуулийн багш, гэр бүл судлаач, доктор, профессор Т.Намжил үндсэн илтгэл тавьж, Хууль зүй, дотоод хэргийн дэд сайд В.Удвал Гэр бүлийн тухай хуулийн шинэчилсэн найруулгын талаар танилцуулав. Мөн гэр бүл судлаач, доктор, дэд профессор Б.Оюун-Эрдэнэ “Олон улсын түвшинд гэр бүлийн асуудалд анхаарч байгаа нь”, "Гэр бүлд ээлтэй шийдэл" ТББ-ын судалгааны ажилтан С.Отгонбаатар “Залуучууд ба гэр бүл” илтгэл тавьж, оролцогчид саналаа илэрхийллээ.
Илтгэгчид монгол гэр бүлийн уламжлалд ихээхэн өөрчлөлт орж, шинэ шинэ асуудлууд тулгарч байгааг баримтаар ярив. Монголд өөр өөр соёлт гэр бүл, ижил хүйстний гэр бүл, хамтран амьдрагч, гэрээт гэр бүл гэсэн шинэ хэлбэрүүд үүссэнээс гадна гэр бүлийн хариуцлагаас зайлсхийж ганцаар амьдрах, гэр бүл салах, цөөн хүүхэд төрүүлэх, өрх, үр хүүхдийнхээ төлөө хүлээх эмэгтэйчүүдийн үүрэг нэмэгдэх хандлага газар авч, өмчийн зөрчил ихэссэн байна. Давхар иргэншлийг хуульчлах, гэр бүлийн асуудал хариуцсан төрийн захиргааны байгууллага яам юм уу агентлаг, гэр бүлийн дагнасан шүүх бий болгох шаардлагатайг олон хүн хэлж байв. Дурьдсан тулгамдсан асуудлуудыг шийдвэрлэхэд бүр цэцэрлэгийн наснаас эхлээд дунд сургууль төгстөл нь гэр бүл, түүний хариуцлагын талаар уламжлалт зөв ойлголт өгөх сургалтыг хичээлийн хөтөлбөрт оруулах хэрэгтэй гэж хэлэлцүүлэгт оролцогчид үзэж байна. Боловсролын хуулиас сурагчдын хүмүүжлийн асуудлыг багш тодорхой хэмжээгээр хариуцах заалтуудыг авч хаясан нь их буруу болжээ. Сургууль бүр дээр сэтгэл зүйн зөвлөгөө өгөх өрөө бий болгох нь нэн чухал байна. Өнөөдрийн гэр бүлийн асуудлаарх хөрөнгө оруулалт маргаашийн иргэдийн ёс зүйг тодорхойлно гэдгийг анхаарах цаг болсон хэмээн тэд тэмдэглэж байв.
Гэр бүлийн 1:1 гэсэн тулгуур зарчим алдагдаж, замбараагүй байдал газар авч байна. Ажилгүй, цалин орлого бага, орон сууцгүй гэдэг шалтгаанаар олон мянган хүн гадаад явж байна. Бас нэг хэсэг нь хог түүгч, биеэ үнэлэгч болж байна. Олон жил гэр бүлийн сөрөг хандлага, зөрчил гажуудлын тухай ярилаа. Олигтой үр дүн гарахгүй байна. Иймээс гэр бүлийн асуудлаар дагнан ажилладаг төрийн бус байгууллагуудын нэгдсэн сүлжээ бий болгоё. Төр дангаараа энэ асуудлыг хариуцахад хүч хүрэхгүй юм байна. Харин төрийн бус байгууллагууд, иргэд шийдвэр гаргагчдад саналаа хэлдэг, идэвхтэй нөлөөлдөг, хяналт тавьдаг байх хэрэгтэй. Ургийн бичгийг хатуу хөтөлдөг, хэвлэл, мэдээллийн байгууллагад зөвшөөрөл олгохдоо гэр бүлийн боловсрол, хариуцлагын талаар нийтлэл, нэвтрүүлэг хийх хувь хэмжээг зааж, Оюуны өмчийн газраар хяналт тавиулвал зохистой байна. Оролцогчид энэ мэт олон санал хэлж, хэлэлцүүлгийн эцэст зөвлөмж гарган Ерөнхийлөгчийн зөвлөх Ч.Сосормаад гардууллаа.
“Монгол гэр бүл асуудал шийдэл”
хэлэлцүүлгийн протокол
Дэлхийн гэр бүлийн өдрийг угтан 2011.05.12-ны өдөр “Гэр бүлд ээлтэй шийдэл” ТББ, Улаанбаатар дээд сургуулийн санаачилгаар МУ-ын ерөнхийлөгчийн дэргэдэх Иргэний танхимд “Монгол гэр бүл” асуудал-шийдэл анхдугаар хэлэлцүүлгийг зохион байгууллаа. Хэлэлцүүлэгт гэр бүл судлаачид, төрийн болон ТББ-н төлөөлөл нийт 70 орчим хүн оролцлоо.
Хэлэлцүүлгийг нээж МУ-н ерөнхийлөгчийн зөвлөх Ч.Сосормаа үг хэлсэн бөгөөд “Монгол гэр бүл асуудал шийдэл” сэдвээр Улаанбаатар их сургуулийн багш, гэр бүл судлаач, шинжлэх ухааны доктор профессор Т.Намжил, “Олон улсад гэр бүлийн асуудалд анхаарч байгаа нь” сэдвээр бүл судлаач, боловсролын доктор, дэд профессор Б.Оюунэрдэнэ, “Залуучууд ба гэр бүл” сэдвээр “Гэр бүлд ээлтэй шийдэл” ТББ-н судлаач С.Отгонбаатар нар тус тус илтгэл танилцуулсан юм.
Мөн хэлэлцүүлэгт ХЗДХЯ-ны дэд сайд В.Удвал “Гэр бүлийн хуулийн шинэчилсэн найруулга” төслийг танилцуулсан, МУ-н Ерөнхийлөгчийн ҮАБ-н бодлогын зөвлөх М.Батчимэг “Үндэсний аюулгүй байдлын бодлого дахь гэр бүлийн асуудал”-р мэдээлэл хийсэн юм.
Илтгэгчид илтгэлээ танилцуулсаны дараа “Монгол гэр бүл” асуудал-шийдэл анхдугаар хэлэлцүүлгийн хүрээнд оролцогчид чөлөөтэй санал солилцож, зөвлөмж боловсрууллаа.
“Монгол гэр бүл асуудал-шийдэл”
анхдугаар хэлэлцүүлгээс гарсан зөвлөмжийн төсөл
• Гэр бүлийн асуудлыг эрхэлсэн төрийн байгууллага, бүтэцтэй болох зайлшгүй шаардлага байна. Үүний тулд ТББ-д нэгдэж сүлжээ болох замаар нөлөөллийн үйл ажиллагааг өрнүүлнэ.
• Нэгэнтээ төлөвшисөн гэр бүлүүдийг дахин төлөвшүүлж гэр бүлийн боловсрол олгоно гэдэг төвөгтэй асуудал. Иймээс залуучуудыг гэр бүлийн амьдралд бэлтгэх, залуу гэр бүлүүдийн төлөвшилд туслалцаа үзүүлэх зорилгоор боловсролын тогтолцоонд өөрчлөлт хийж гэр бүлийн боловсролыг цэцэрлэг, дунд сургуулиас нь олгох хэрэгтэй байна.
• Гэр бүлд зориулсан зөвлөгөө, сургалтын хэрэгцээ нийгэмд асар их байна. Иймээс энэ төрлийн үйл ажиллагаа явуулдаг байгууллагуудыг улам бүр чадвахижуулах нэг чиглэлтэй болгох нь зүйтэй.
• Өнөөдөр гэр бүлийн боловсролыг гарын доорхи мэдээллийн эх сурвалжуудаас олж авч байна. Харамсалтай нь хэвлэл мэдээллийн хэрэгсэлээр цацагдаж буй мэдээлэл төдийлөн Монгол хүнд тохирохгүй, цаашлаад ёс зүйгүй байдлыг газар авхуулж байна. Иймээс тв, хэвлэл мэдээллийн хэрэгсэлд хяналт тавих гэр бүлийн боловсрол олгох нэвтрүүлэг, нийтлэлийн буланг нэмэгдүүлэх хэрэгтэй.
• Гэр бүлийн боловсролыг нэмэгдүүлэх үүднээс энэ чиглэлийн ТББ-г нэгтгэсэн вэб хуудас ажилуулах нь зүйтэй.
• Гэр бүлийн чиглэлэээр ажилдаг ТББ-н сүлжээ нь боловсон хүчний бодлогыг зангидах байгууллага болно. Энэ байгууллага гэр бүлийн чиглэлээр үйл ажиллагаа явуулах боловсон хүчнийг бэлтгэх, цаашлаад гэр бүлийн асуудал эрхэлсэн төрийн байгууллагатай болоход боловсон хүчний урьдач нөхцөлийг бүрдүүлэхэд чиглэнэ.
• Одоо байгаа төрийн бодлогыг хэрэгжүүлэх талаар ажиллаж, төрд нөлөөлөл үзүүлнэ.
"Монгол гэр бүл тулгамдсан асуудал ба шийдэл" анхдугаар хэлэлцүүлэг
