Ингээд чуулганы 12, 13, 14, 15 дугаар буюу сүүлийн дөрвөн салбар хуралдаан боллоо.
Арван хоёрдугаар салбар хуралдаан “Шүүхийн ил тод байдал, шүүгчийн хариуцлагын тогтолцоо” сэдвээр өрнөж, шүүгчийн ёс зүйн асуудлыг Хуульчдын холбооны хүрээнд журамлан зохицуулах, иргэдээс гаргаж буй өргөдөл, гомдолд хамгийн их нэр дурдагдаж буй тэр албан тушаалтнуудыг эрдэмтэн мэргэд, олон нийтийн төлөөллийн оролцоотой тусгайлан шалгаж шийдвэрлэдэг байх, нэгэнт үндэслэлгүй нь тогтоогдсон шүүхийн шийдвэрийн улмаас учирсан иргэн, хуулийн этгээдийн хохирлыг хэн барагдуулахыг хуульчилж, шүүгчид тооцох хариуцлагыг тодорхой болгох, сахилгын шийтгэлийн нэр, төрлийг өргөн сонголттой байлгах, сонирхлын зөрчлөөс урьдчилан сэргийлэх, бүртгэх механизмыг нэвтрүүлэх, шүүхийн шийдвэрийг нээлттэй болгох журам, хугацааг хуульд тусгах, шийдвэрийн үндэслэл, талуудын байр суурийг тодорхой бичдэг байх зэрэг санал дэвшүүллээ.
“Эрүүгийн байцаан шийтгэх үйл ажиллагаа” сэдэвт арван гуравдугаар салбар хуралдаанд оролцогчид Эрүүгийн хуулийн ялын бодлогыг эргэн харах, гэмт хэргийн ангилал, бүрэлдэхүүнийг дэлхий нийтийн жишиг, Монгол орны онцлогт нийцүүлэх, Англи саксоны эсхүл Ром Германы, нэг бол одоогийн холимог системийн чухам алийг нь хуулийн тогтолцоондоо сонгон хэрэглэх асуудлыг эцэслэн шийдвэрлэх үүднээс уг асуудлыг судалж дүгнэлт гаргах ажлын хэсэг байгуулах, мэтгэлцэх зарчмыг бодитойгоор хэрэгжүүлэх, ингэхдээ өмгөөлөгчийн эрх хэмжээг нэмэгдүүлэх, тэдэнд нотлох баримт бүрдүүлэх боломжийг хуулиар олгох, шүүх хуралдааны талуудыг зөвхөн давж заалдах журмаар гомдол, эсэргүүцэл гаргадаг тэгш эрхтэй болгож, прокурор, ерөнхий шүүгч эсэргүүцэл, дүгнэлт бичдэгийг халах, шүүхээс хэргийг мөрдөн байцаалтад буцаадгийг болиулах санал гаргав. Сэжигтэн, яллагдагчийн эрхийн талаар цагдан хорих, албадан саатуулах үндэслэл, журмыг тодорхой болгох, Монгол Улсын нэгдэн орсон хүний эрх, эрх чөлөөний талаарх олон улсын гэрээний заалтуудыг байцаан шийтгэх ажиллагаанд бүрэн хэрэгжүүлэх, цагдан хорих арга хэмжээ авах шүүх хуралдаанд сэжигтэн яллагдагчийг заавал оролцуулах журам тогтоох, сэжигтэн, яллагдагч нь гэрчтэй нүүрэлдэх эрхтэй байхаар хуульчлах хэрэгтэй гэж ярилаа. Мөн Эрүүгийн байцаан шийтгэх хуульд хэрэг бүртгэлт, мөрдөн байцаалтын хугацааг олон улсын жишгийн дагуу зохистойгоор тогтоох, хэрэг хялбаршуулсан журмаар шийдвэрлэх ажиллагааг тодорхой болгох, ял тохиролцох замаар хэргийг шуурхай шийдвэрлэх механизмыг бүрдүүлэх, иргэдийн төлөөлөгчдийн эрх үүргийг хуульчлан тогтоох, гэрчийн эрх, үүргийг тодорхой болгож, гэрчийн мэдүүлэг үнэн бодитой байх хуулийн шаардлагыг хангах хуулийн зохицуулалт хийх, прокурор нь төрийг төлөөлөн, хохирогчийн хууль ёсны ашиг сонирхлыг хамгаалдаг тогтолцоог бий болгох, давж заалдах шатны хуралдаанд шүүгч нар хэрэг танилцуулдаг зарчмыг халах, ажлын бус цаг, амралтын өдрүүдэд цагдан хорих таслан сэргийлэх арга хэмжээ авах жижүүрийн шүүгч, прокурорыг ажиллуулах, насанд хүрээгүй хүүхдүүдэд холбогдох хэрэгт байцаан шийтгэх ажиллагаа явуулах бие даасан бүтцийг мөрдөн байцаах, прокурор, шүүхийн байгууллагуудад бий болгох замаар Монгол Улсын нэгдсэн орсон хүүхдийн эрхийн талаарх Олон улсын гэрээний заалтуудыг хэрэгжүүлэх санал гаргасан байна.
“Хуульчдын өөрөө удирдах ёсны мэргэжлийн тогтолцоо” сэдэвт арван дөрөвдүгээр салбар хуралдаанд оролцогчид хуульчдын холбооны мэргэжлийн өөрөө удирдах тогтолцоог нэвтрүүлэх, АНУ-ын Барын тогтолцоог авч хэрэгжүүлэх, “Монголын хуульчдын холбоо” нэртэй байгууллага байгуулах, хуульчийн сонгон шалгаруулалтыг боловсронгуй болгох, өмгөөллийн шалгалтыг нэгтгэх, мэргэжлийн ёс зүйг сайжруулах, хариуцах байгууллагыг тодорхой болгох, мэргэжлийн стандарт тогтоох, лиценз олгодог, салбар салбарын хуульчдыг бэлтгэдэг, сургадаг, давтан сургадаг чиг үүргийг Хуулчдын өөрөө удирдах байгууллагад шилжүүлэх, хуульчдын өөрөө удирдах байгууллага байгуулах зөвлөмж гарвал УИХ-д өргөн баригдсан өмгөөллийн тухай хуулийн төслийг татаж авах, салбарын яамны гэрчилгээ олгодог эрх мэдлийг хасах, шүүгчдийг хуульчдын холбооноос чөлөөт өрсөлдөөний үндсэн дээр сонгодог болох, хуульчдын тухай хуулийн төсөл боловсруулах санал дэвшүүлжээ.
“Иргэдийн эрх зүйн боловсрол” сэдэвт арван тавдугаар салбар хуралдаанд оролцогчид олон санал гаргав. Тухайлбал иргэний эрх зүйн боловсролыг цэцэрлэг, дунд болон их дээд сургуулийн хичээлийн хөтөлбөрт оруулах, практик дадлага олгох, нийгмийн ухааны хичээлүүдийн агуулгад туссан иргэний эрх зүйн боловсролын ойлголтуудыг нэг мөр болгох, иргэний эрх зүйн боловсрол олгох асуудалд орон нутгийн иргэдийн хурлыг татан оролцуулах, эрх зүйн мэдээлэл авах нөхцөл бололцоог орон нутагт сайжруулах, сум болгонд зориулан эрх зүйн хөтөч боловсон хүчин бэлтгэх, иргэний эрх зүйн боловсролд төрөөс олгох санхүүжилтийг нэмэгдүүлэх, иргэний эрх зүйн боловсролын талаар судалгаа хийх, хэвлэл мэдээллийн хэрэгслээр хүргэх, иргэдэд иргэний эрх зүйн боловсрол олгох эрх зүйн стратегийн баримт бичигтэй болох, бага насны хүүхдэд иргэний эрх зүйн боловсрол, эрх, хариуцлагын талаар бүрэн мэдээлэл өгөх, багш нарын ёс зүйн харилцааг дээшлүүлэх, сэтгэл зүйн сургалтад хамруулах, иргэний танхимаар эрх зүйн боловсрол олгох, иргэний эрх зүйн боловсролын сүлжээ байгуулах хүсэлтэй байгаагаа оролцогчид илэрхийллээ.
Хаалтын нэгдсэн хуралдаан дээр салбар хуралдаан бүрийн даргалагч эрх зүйн шинэчлэлээр оролцогчдын гаргасан санал, зөвлөмжийг нэгтгэн уншин сонсгосны дараа Монгол Улсын Ерөнхийлөгч Ц.Элбэгдорж товч үг хэлсэн бөгөөд энэхүү нийгмээрээ хүсэн хүлээж байсан арга хэмжээг зохион байгуулахад идэвхтэй оролцсон, тусалсан бүх хүн, байгууллагад талархал илэрхийлснээр чуулган өндөрлөв.
