Дээд Шүүхийн мэдээллийн төвд өнөөдөр нэгэн хэвлэлийн бага хурал болов. Энэ бол Захиргааны хэргийн давж заалдах шатны шүүх үүдээ нээснээ зарлаж буй нь. Долоон жилийн өмнө захиргааны хэргийн дагнасан шүүх байгуулагдсан нь цоо шинэ үйл явдал болсон ч нэгэн зүйл үгүйлэгдсээр байсан билээ. Тэр нь Захиргааны хэргийн давж заалдах шатны шүүх юм. Учир нь Захиргааны хэргийн шүүхээр шийдвэрлэсэн хэргийн 60 шахам хувь нь иргэд, хуулийн этгээдийн талд шийдэгддэг ч давж заалдах нь цөөнгүй байлаа. Энэ тохиолдолд Улсын Дээд Шүүхийн захиргааны хэргийн танхимын 6 шүүгч давж заалдах болон хяналтын шатны чиг үүргийг нь гүйцэтгэж байв.
Монгол Улсын Ерөнхийлөгч Ц.Элбэгдорж шүүхийн шинэтгэлийг гүнзгийрүүлэх хөтөлбөрөө хэрэгжүүлж эхэлсний үр дүнд УИХ-аас Захиргааны хэргийн давж заалдах шатны шүүх байгуулах тухай хууль баталж, 2011 он гармагц шинэ шүүхийн бэлтгэл ажлыг базааж эхэлсэн юм. Хэдхэн хоногийн өмнө Монгол Улсын Ерөнхийлөгч зарлиг гарган, Захиргааны хэргийн давж заалдах шатны шүүхийн ерөнхий шүүгч болон 4 шүүгчийг томилж ажилд нь оруулсан. Тус шүүх 7 шүүгчтэй, нийт 29 хүний орон тоотойгоор ажиллах бөгөөд Засгийн газрын 7 дугаар байранд төвхнөх ажээ.
Хэвлэлийн бага хуралд Монгол Улсын Ерөнхийлөгчийн ахлах зөвлөх П.Цагаан оролцлоо. Тэрээр “Өнөөдөр шүүх эрх мэдлийн түүхэнд чухал тэмдэглэлт өдөр болж байна. Үндсэн хуульд заасны дагуу иргэдээ захиргааны байгууллага, албан тушаалтны хууль бус үйлдэл, шийдвэрээс шүүхийн журмаар дагнасан, мэргэшсэн түвшинд хамгаалах боломж бүрдэж байна. Урьд нь давж заалдсан маргааныг эрүү, иргэний танхимаас шүүгч оролцуулан шийддэг байлаа. Үүнийг энгийнээр зүйрлэж хэлбэл бөөр нь өвдсөн хүнд шүдний эмч жор бичиж байгаатай адил юм. Тиймээс Захиргааны хэргийн давж заалдах шатны шүүх үүдээ нээж буйд баяртай байна. Энэ нь Монгол Улс иргэдийнхээ өргөдөл гомдол, маргааныг дагнасан, мэргэжсэн, төрөлжсөн, бие даасан хараат бус шүүхээр шийдвэрлэнэ гэсэн үг” хэмээн хэлэв.
