Монгол Улсын Ерөнхийлөгч Ц.Элбэгдоржид Монголын Антрактид судлалын нийгэмлэгийн ерөнхийлөгч Л.Дүгэржав өнөөдөр бараалхав. Манай нийгэмлэгийнхэн Европын Холбооны төслийн хүрээнд Болгарын судлаачидтай хамтран ажилладаг. Төсөл 4 жил хэрэгжээд өнөө жил дуусч байгаа. Монгол, Болгарын Засгийн газар хоорондын комиссын хуралдаанаар хэлэлцээд сунгах боломжтой гэж үзсэн. Бид тэнд цэвдэг судлалын ажилд оролцдог.
Бусад судлаачид маань цэвдэггүй газрынх. Тийм болохоор монголын судлаачид ажиллахад илүү тохиромжтой байдаг. Нэгд цэвдэгтэй орных, хоёрт хүйтэнд ажиллах тэсвэр хатуужил сайн. Энэ жил гурван хүн тийш явна. Одоогоор тэнд 10 гаруй орны судлаачид ажиллаж байгаа. Монголчууд өөрийн баазыг Ливингстонд байгуулах бодолтой ажиллаж байна. Монгол Улс Антрактидын конвенцид нэгдвэл туйлын баялгаас хувь хүртэх боломжтой болно. 43 орон энэ конвенцид нэгдээд байгаа. Тиймээс энэ асуудлыг анхаарч үзэхийг танаас хүсье хэмээн тэр хэллээ.
Дараа нь 2007 онд Антрактид өөрийн авч явсан төрийн далбааг Ерөнхийлөгчид дурсгал болгон гардуулж, Антрактидад зочлохыг урилаа. 20-иод орны Ерөнхийлөгч тэнд зочлоод байгаа ажээ.
