Ерөнхийлөгчийн Тамгын газар, УИХ-ын Аюулгүй байдал, гадаад бодлогын байнгын хороо хамтран “Үндэсний аюулгүй байдал ба хэвлэл, мэдээлэл” сэдэвт хэлэлцүүлэг “Иргэний танхим”-д өнөөдөр зохион байгууллаа. Хэлэлцүүлэгт УИХ-ын Аюулгүй байдал, гадаад бодлогын байнгын хорооны дарга Я.Батсуурь, УИХ-ын гишүүн З.Энхболд, Р.Амаржаргал болон төвийн хэвлэл, мэдээллийн байгууллагуудын удирдлага, “Глоб интернэйшнл” ТББ-ын ажилтан оролцов.
Хэлэлцүүлгийг Ерөнхийлөгчийн Тамгын газрын дарга Д.Баттулга үг хэлж нээлээ. Тэрээр хэлэхдээ “ Өнөө үед аюулгүй байдлын асуудал нэн өргөн хүрээг хамарч, төр аюулгүй байдлыг иргэдийн оролцоогүйгээр дангаараа хангах тухай ойлголт байж болохгүй болжээ. Иймээс шинэ үзэл баримтлалд үндэсний аюулгүй байдлыг хангах үйл ажиллагаа бүхэлдээ төр-иргэний хамтын ажиллагаан дээр суурилна гэдгийг тодорхой заасан.
Үнэхээр ч аюулгүй байдал гэдэг ганц төрийн асуудал бус, аюулгүй байгаа эсэхээ мэдэх нь иргэдийн эрх, мөн аюулгүй байдлыг хангахад оролцох нь иргэн хүний журамт үүрэг байх ёстой. Иргэд аюулгүй байдлыг хангахад ухамсартайгаар оролцож, хувь нэмрээ оруулахын тулд мэдээлэлтэй байх ёстой. Тиймээс хуулиар хориглоогүй л бол үндэсний аюулгүй байдалтай холбогдолтой мэдээ, мэдээллээр иргэдээ түлхүү хангахад төр чухалчлан анхаарах ёстойг үзэл баримтлалд онцлон заасан байгаа.
Иргэдийг, нийгмийг мэдээллээр хангах чухал гүүр нь яахын аргагүй хэвлэл мэдээлэл билээ. Аюулгүй байдлыг хангах үйл ажиллагаанд иргэдийн ухамсарт оролцоог өдөөн идэвхижүүлэхэд хэвлэл, мэдээллийн байгууллагууд, сэтгүүлчид хамгийн чухал хувь нэмэр оруулах боломжтой.
Манайд мэдээллийн нууцлалын асуудлаарх эрх зүйн зохицуулалт цаг үеэс хоцорч байгаагаас төрийн байгууллагууд аюулгүй байдал, төрийн нууц гэсэн том нэрээр далайлган өөрсдийн дутагдал доголдлоо хүртэл хаацайлах явдал хаа сайгүй байна. Нөгөө талаас иргэдийн хувьд ч, хэвлэл, мэдээллийн байгууллага, сэтгүүлчдийн хувьд ч аюулгүй байдал гэсэн үг төрд илүү хамаатай мэт, өөрсдөөс нь хол хөндий асуудал мэт үзэж цэрвэх явдал байна.
Орчин үеийн нийгэм дэх чөлөөт хэвлэлийн хөгжил, мэдээллийн технологийн дэвшил нь мэдээллийн салбарыг үндэсний аюулгүй байдлын маш чухал бүрэлдэхүүн хэсэг болгон хувиргажээ. Мэдээллийг нийгмийн тогтвортой байдлыг бусниулах, улс орны санхүү эдийн засгийг туйлдуулах, дотоодын үймээн самуун, төрийн эргэлт хүртэл гаргах хүчтэй зэвсэг болгон ашиглах боломжтой цаг үед та бид амьдарч байна.
Эндээс Та бүхний ажил мэргэжил улс үндэсний аюулгүй байдалтай ямар чухал сэжмээр холбоотойг, сэтгүүлчид та бүхэн улс орныхоо сайн сайхны төлөө ямар их хувь нэмэр оруулах боломжтойг бэлхнээ харж болно.
Иргэдийг бодитой, тэнцвэртэй мэдээллээр хангах, үндэсний эрх ашгийг эрхэмлэсэн хариуцлагатай, мэргэшсэн сэтгүүлзүйг хөгжүүлэх, нийгмийн сэтгэлзүйг төлөвшүүлэхэд төр, иргэн, хэвлэл мэдээллийн байгууллагууд хамтран ажиллах нь чухал байна” гэв.
Мөн УИХ-ын Аюулгүй байдал, гадаад бодлогын байнгын хорооны дарга Я.Батсуурь, Ерөнхийлөгчийн Үндэсний аюулгүй байдлын бодлогын зөвлөх М.Батчимэг нар өнгөрсөн онд батлагдсан Үндэсний аюулгүй байдлын үзэл баримтлалын гол агуулга, онцлогийг мэдээллийн аюулгүй байдалтай холбон товч танилцуулсны дараа чөлөөт хэлэлцүүлэгтээ оров.
Хэвлэлийнхэн зарим нь үндэсний аюулгүй байдлын үзэл баримтлалыг мөрдөж ажиллахад тодорхой чиглэл өгөхийг хүсч байхад нөгөө хэсэг нь хуулиа биелүүлээд явахад болно гэсэн байр суурь илэрхийллээ. Түүнчлэн УИХ Хэвлэл, мэдээллийн хэрэгслийн тухай хуулийн болон Хэвлэлийн эрх чөлөөний тухай хуулийн төслийг хэлэлцээд баталчихвал тэдгээрээр зохицуулагдаад явах боломжтой хэмээж байв. Харин “Глоб интернэйшнл” байгууллагын төлөөлөгч хэлэхдээ “Санамсаргүйгээр үндэсний аюулгүй байдалд харшилсан мэдээлэл гаргана гэсэн ойлголт байж болохгүй. Хэвлэл, мэдээллийн байгууллагууд редакцийн бодлоготой, хариуцлагатай, мэргэшсэн, туршлагатай, ёс зүйтэй байж ийм алдаанаас зайлсхийх ёстой” гэж ярилаа.
Мэдээллийн аюулгүй байдлыг хангах үндэс нь үндэсний ашиг сонирхлыг хамгаалах, төр, иргэн, хувийн хэвшлийн мэдээллийн бүрэн бүтэн, нууцлагдсан, хүртээмжтэй байдлыг баталгаажуулах гэж үзэл баримтлалд өгүүлсэн байна.
