Монгол Улс Халхын голын түүхт ялалтынхаа 70 жилийн ойг ёслол төгөлдөр тэмдэглэж буй энэ үед Голланд Улсын Роттердам хотноо болсон Жудо бөхийн Дэлхийн аварга шалгаруулах тэмцээнд гарамгай амжилт гарган “Дэлхийн аварга” хэмээх нэр төртэй алдрын эзэн болсон Таньд Монголын ард түмний өмнөөс болон хувиасаа чин сэтгэлээсээ талархаж буйгаа илэрхийлье!
Улс орон, тив дэлхийн хэмжээний олон арван спортын тэмцээнд таны үзүүлсэн амжилт бол монгол хүн бүрийн баяр бахдалыг төрүүлж, урам зоригийг бадрааж залуу үеийнхэнд үлгэр дууриал болж байна.
Афины Олимпийн хүрэл медаль, Ази тив болоод Дэлхийн аваргын алтан медалиуд, самбо, жудо бөхөөр зөвхөн улсдаа 13 удаа түрүүлсэн энэ амжилт бол Таны хөлс хүч, эр зориг, тэсвэр тэвчээр болон эх оронч үзлээр тань буй болсон Монгол түмний минь бахархал юм. Цаашид ч ард түмнээ улам их баярлуулан дараа дараагийн олимп, тив дэлхийн нэр хүндтэй тэмцээнүүдэд Алтан сүлдэт төрийн далбаагаа ямагт мандуулж явахын өлзий дүүрэн ерөөлийг өргөн дэвшүүлж, таны амьдралд сайн сайхан бүхний дээдийг хүсэн ерөөе.
