Эрхэм хүндэт Баян-Өлгийчүүд ээ,
Монгол орныхоо өнцөг булан бүрт ажиллаж, амьдарч буй нийт Казах иргэдээ,
Та бүхэндээ өнө эртнээс уламжлагдан ирсэн казах түмний ёс заншил, өв соёл болох Наурыз баярын мэнд дэвшүүлж, аз жаргал, сайн сайхныг хүсэн ерөөе. Өвлийг өнтэй сайхан давж, өөр өөрсдийн ажил үйлсдээ өндөр амжилт гаргажээ, Та бүхэн. Казахууд эрх чөлөөг эрхэмлэдэг, шударга, хөдөлмөрч, сайхан ард түмэн.
Баярын энэ өдөр улс эх орныхоо хөгжил дэвшилд Өлгий нутгийн ард иргэдийн оруулж буй хөдөлмөр бүтээлийг Монгол Улсын төр засаг ямагт өндрөөр үнэлж байдгийг хэлэхэд таатай байна.
Наурыз нь эсгий туургатны эрх тэгш нэгэн гишүүн болох казах түмний эртнээс баримталж ирсэн цаг тооллын уламжлал ёсоор өдөр, шөнө тэнцсэн өдөр тохиодог хаврын баяр билээ.
Миний бие өнгөрсөн онд Өлгийчүүдтэйгээ нүүр тулан уулзаж, Та бүгдийн ажил амьдралтай танилцаж, улс орныхоо хөгжил дэвшил, сайн сайхан ирээдүйн талаар санал бодлоо илэрхийлэн харилцан ярилцаж, хаврын баяраа хамтдаа золгон тэмдэглэсэнээ тодхон санаж байна.
Манай орны хүн зон маань зарим талаараа өөр өөрийн онцлогтой үндэстэн, ястнуудын бүрдэл шинж бүхий боловч нэгэн цул, нэгдмэл эрх ашигтай Монгол хэмээх төр улсын эрх тэгш ард иргэд байж, зовлон жаргалаа хуваалцан, бие биенийхээ ёс заншлыг хүндэтгэн дээдэлж өөр хоорондоо эвтэй найртай аж төрж ирсэн сайхан уламжлалтай билээ.
Өнөөдөр манай улсын казах түмэн дэлхийн казахуудын дунд хэл, соёл, ёс заншлаа унаган төрхөөр нь хадгалан үлдсэнээрээ гайхуулж байгаа нь бидний зүй ёсны бахархал мөн. Наурыз баяраа архи дарсгүйгээр тэмдэглэн өнгөрүүлдэг нь үлгэр жишээ зүйл юм.
Баян-Өлгий аймаг нь хүн ам нэлээд нягт сууршилттай, ажиллах хүчний нөөц, чадамж ихтэй. Иргэний ардчилсан нийгмийг цогцлоон байгуулж буй өдгөө цагт та бидэнд хийж бүтээхээс илүү эрхэм чухал зүйл үгүй. Иймээс төрж өссөн өлгий нутагтаа бүтээн байгуулах их үйл хэргийг улам өрнүүлж, аж ахуйн нэгж, айл өрх, хүн бүр оршин суугаа газар бүрдээ ахуй, амьдралаа тогтвортой өөдлүүлэн дэгжээх нь чухал байна.
Хөдөө, орон нутагт ажиллаж, ард иргэдийнхээ санаа бодлыг сонсож байхад иргэдийн эрх, иргэний оролцоо, шударга ёсны асуудал байнга яригдаж байна. Монголын төр ард түмнийхээ үргэлжлэл мөнийн хувьд эдгээр асуудлыг шийдвэрлэх болноо.
Өгөөж баян газар нутаг, өсөж үрждэг мал сүрэг, орчин цагийн боловсрол мэдлэг, үндэсний цөөнхид онцгой анхаарал тавьдаг Монгол төрийн бодлого, казах түмний ажилсаг хөдөлмөрч чанар, энэ бүхэн бол Баян-Өлгийчүүдийн хөгжлийн баталгаа мөн.
Эрхэм хүндэт Казах иргэдээ,
Та бүхэндээ хаврын уламжлалт Наурыз баяраараа айл саахалт, ахмад буурлуудаа хүндэтгэн золгож, туулай жилдээ элгээрээ энх амар, төрлөөрөө түвшин амгалан байхын өлзийтэй ерөөлийг өргөн дэвшүүлье.
Мөнх хөх тэнгэрийг эрхшээсэн бүргэд хэмээх хийморлог жигүүртэнтэй нөхөрлөсөн ард түмний үйл хэрэг, хувь заяа үргэлж өөдрөг, мандан бадарч байх болно гэдэгт огтхон ч эргэлзэхгүй байна.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны 3 дугаар сарын 21-ний өдөр
Улаанбаатар хот
