Өнөөдөр 11 цагт Азийн Хагжлийн банкны Дэд Ерөнхийлөгч Лаврэнс Грийнвүүд болон Азийн хөгжлийн банкны Монгол Улс дахь суурин төлөөлөгч Адриан Рутэнбэрг, Монгол Улсыг хариуцсан Гүйцэтгэх захирал Сираж Шамсуддин нар Ерөнхийлөгч Ц.Элбэгдоржтой уулзав.
Монгол Улсын Ерөнхийлөгч Цахиагийн Элбэгдорж уулзалтын эхэнд хэлсэн үгэндээ: “Манай улс 1991 оноос хойш Азийн хөгжлийн банктай хамтран ажиллаж байгаа бөгөөд гадаадаас авч буй зээл тусламжийн 30 гаруй хувийг тус банкнаас авсан байна. Азийн хөгжлийн банкны зээл тусламжаар боловсрол, эрүүл мэнд, эрчим хүч гээд олон салбарт хөрөнгө оруулалт хийж ирлээ. Зөвхөн өнгөрсөн жилийн байдлаар л гэхэд 90 орчим сая долларын зээл тусламжийн асуудал шийдэж манай улсад хөрөнгө оруулалт хийж байгаа явдалд талархал илэрхийлье” гэж онцолсон юм.
Азийн хөгжлийн банкны Дэд Ерөнхийлөгч ноён Лаврэнс Грийнвүүд уулзалтын эхэнд хэлсэн үгэндээ: “Хямралын үед Монгол Улсын засгийн газар нийгмийн халамжийн үйлчилгээг дэмжиж байгаа нь тун зөв алхам юм. Ялангуяа энэ асуудлыг зорилтод болгох ч чухал. Нийгмийн халамжийг зорилтод болгох нь улс төр, эдийн засгийн хувьд хүндхэн сорилт болдог. Та бүхнийг энэ асуудал дээр шийдвэртэй алхам хийж байгаад баяртай байна. Азийн хөгжлийн банкны зүгээс та бүхний энэ ажилд тал бүрийн дэмжлэг үзүүлэхэд бэлэн байна” гэдгээ илэрхийлэв. Тэрээр цааш өгүүлэхдээ: “Эдийн засгийг сэргээн босгоход банкны салбар чухал үүрэгтэй. Азийн хөгжлийн банкнаас Монгол Улсад туслах зорилгоор банкныхантай хамтарч ажиллах сонирхол байгаа. Найдваргүй зээлийн хэмжээ хурдацтай өсч байгаад сэтгэл зовинож байна. Мөн банкууд зээлээ зогсоосон байгаа нь хувийн салбар хөгжихөд бэрхшээл учруулж байна. Бид Монгол Улсын засгийн газар ирэх оны төсвийг хэрхэн төлөвлөхийг анхааралтай ажилгаж байна” гэв.
Түүний дараа Ерөнхийлөгч Ц.Элбэгдорж банкны салбарынхантай уулзаж тус салбарт тулгараад байгаа бэрхшээлийг даван туулах талаар хамтран ажиллаж байгаагаа дурьдсан юм. Мөн тэрээр ядуурлыг бууруулахад чиглэсэн өөрийн байр сууриа танилцуулав.
Дараа нь Азийн хөгжлийн банкны Дэд Ерөнхийлөгч хувийн секторууд, жижиг дунд үйлдвэрлэлийг дэмжих шинэ төсөл эхэлж байгаа талаар дурьдсан юм. Мөн мэргэжлийн сургалт олгох төвүүд буюу мэргэжлийн сургалт үйлдвэрлэлийн төвүүдийг дэмжих төсөл хэргэжиж байгааг танилцуулав. Тэрээр хэлэхдээ: “Азийн хөгжлийн банкнаас анхаарал тавьж буй нэг асуудал бол уул уурхайн асуудал юм. Танай улсын зүгээс Оюу-Толгой төсөл дээрх гадаадын хөрөнгө оруулагчтай хийж байгаа гэрээ хэлэлцээр амжилттай хэрэгжиж байгаад баяртай байна. Азийн хөгжлийн банкны хувьд олборлох үйл ажиллагаа явуулдаггүй. Бидний анхаарлаа хандуулаад байгаа нэг чиглэл бол Таван толгой дахь нүүрсний уурхайгаас БНХАУ-руу холбосон төмөр зам тавих асуудал бөгөөд үүн дээр хувийн секторуудтай хамтарч ажиллахад бэлэн байна. Одоогоор зөөвөрлөлтийн ажилд том оврын авто машинууд ашиглаж байгаа бөгөөд энэ нь байгаль экологид хор уршиг учруулсаар байна. Бид энэ чиглэлээр хувийн секторуудад зээл олгох боломжтой бөгөөд хэрэв төмөр зам тавигдсан тохиолдолд бусад хөрөнгө оруулагчдад таатай боломж бүрдэх юм. Манай зүгээс энэ төслийг санхүүжүүлэхийн тулд Монгол Улсын засгийн гартай гэрээ байгуулах юм. Энэхүү гэрээнд тодорхой хэм хэмжээг тусгасан байх бөгөөд одоогийн байдлаар яриа хэлэцээрийн шатанд явагдаж байна. Мөн бас нэгэн чухал төсөл бол уул уурхайн олборлолтын ойр орчмын хот суурингийн хүн амын өсөлтийг тооцоолж эрчим хүч, дэд бүтцийн төсөл судлагдаж байна” гэв.
Түүний дараа Монгол Улсын Ерөнхийлөгч хэлсэн үгэндээ: “Азийн хөгжлийн банкныхан, манай улсын банкны салбарынхантай хамтрач ажиллаж байгаад баяртай байна. Засгийн газар энэ асуудал дээр зөвхөн орчин нөхцлийг нь бүрдүүлж ажиллах нь зохистой юм. Таван толгойн нүүрсний уурхайн дэд бүтэц дээр гадаадын хөрөнгө оруулагчдыг татах танай байр суурийг дэмжиж байна. Энэ мэт сайн харилцаа нь өөр шинэ шинэ төслүүдийн эхлэл болно гэдэгт итгэлтэй байна” гэв.
Дараа нь Азийн хөгжлийн банкны Дэд Ерөнхийлөгч хэлэхдээ: “Гадаадын хөрөнгө оруулагчдыг татах үйл ажиллагааны уялдаа бол чухал асуудал. Үйл ажиллагааны уялдаа гэдэг нь төмөр зам хурдан барих асуудал юм. Энэ баялагийг БНХАУ-д нийлүүлэх үү? Эсвэл зүүн тийш зам тавьж ОХУ-д нийлүүлэх гэдэг нь чухал асуулт юм. Энэ хоёр шийдэл нь харилцан зөрчилдөхгүй бөгөөд бид Монгол Улсын геополитикийн асуудлыг ойлгож байна. Мөн таны хэлсэнчлэн бид бусад салбар дээр ч хамтран ажиллах болно. Мөн бидний анхаарлаа хандуулж байгаа нэг асуудал бол 5 дугаар цахилгаан станцын төсөл дээр ажиллаж байгаа” гэв.
Уулзалтын төгсгөлд Монгол Улсын Ерөнхийлөгч хэлэхдээ: “Бидний зүгээс шийдэл удааширч байгаа тал бий. Гэхдээ энэ нь та бүхний ажлыг уяж хойш татаж байгаа хэрэг биш, манай улс ардчилсан орны хувьд сайтар ярилцаж, хэлэлцэж байж асуудалд нухацтай хандаж байгаа гэдгийг онцлон хэлье” гэв.
