Монгол Улсын Ерөнхийлөгчийн ахлах зөвлөх П.Цагаан Канад Улсаас Монгол Улсад суугаа Онц бөгөөд Бүрэн эрхт Элчин сайд Грегори Гөүлдхокийг өнөөдөр хүлээн авч уулзлаа.
Тэд манай улсын албаны төрийн шинэтгэлийн хүрээнд Канадын Төрийн албаны комиссоос хэрэгжүүлэхээр төлөвлөж буй төсөл, хөтөлбөрийг хэрхэн үр дүнд хүргэх болон төрийн албаны үйл ажиллагааг сайжруулах арга замын талаар санал солилцов.
-Канад Улсын Төрийн албаны комиссын дарга хатагтай Мариа Баррадосын өнгөрсөн нэгдүгээр сард хийсэн айлчлалаар хэлэлцэж тохиролцсон асуудлын хүрээнд энэхүү уулзалт болж байна Энэхүү төсөл, хөтөлбөрийг үр дүнтэй хэрэгжүүлэхийн тулд Төрийн албаны эрх зүйн орчинг сайжруулах тал дээр анхаарал хандуулах хэрэгтэй юм. Манай оронд хэрэгжиж байсан гадаад, дотоодын төсөл, хөтөлбөрүүд тухайн салбарынхаа эрх зүйн орчинг сайжруулах тал дээр хангалттай анхаарал тавьж чадаагүйгээс болж төдийлөн хүссэн үр дүнд хүрээгүй, хүчин чармайлтаа дэмий үрсэн тохиолдол цөөнгүй байсан. Гадаад, дотоодын байгууллагууд аливаа төсөл, хөтөлбөр хэрэгжүүлэхдээ юуны өмнө тухайн салбар, чиглэлийнхээ хууль, эрх зүйн орчинг сайтар судалж, шаардлагатай тохиолдолд хууль тогтоомжид зохих нэмэлт, өөрчлөлтүүдийг оруулах асуудлаар хууль тогтоох болон гүйцэтгэх эрх мэдлийн байгууллагуудтай нягт хамтран ажиллах хэрэгтэй юм. Ингэснээр тухайн төсөл, хөтөлбөр удаан хугацаанд амжилттай хэрэгжих үндэс болно” хэмээн өөрийн байр суурийг илэрхийллээ.
