ОХУ-ын Ерөнхийлөгч Эрхэм хүндэт Дмитрий Анатольевич Медведев,
Эрхэм хүндэт ахмад дайчид аа,
Хүндэт зочид төлөөлөгчид өө,
Хатагтай ноёд оо
Монгол Улсын тусгаар тогтнол, бүрэн эрхт байдлыг бататган бэхжүүлэх үйлсэд түүхэн үүрэг гүйцэтгэсэн Халхын голын байлдааны ялалтын 70 жилийн ойд зориулсан баярын хуралд оролцож буй Та бүхэнд чин сэтгэлийн талархал илэрхийлж, халуун дотно мэндчилгээ дэвшүүлье.
Хоёр орны ард түмэн, цэрэг эрсийн хамтын түүхт ялалтын ойн арга хэмжээ, баярын хуралд Монгол Улсын Ерөнхийлөгчийн урилгыг хүлээн авч, хүрэлцэн ирсэн Оросын Холбооны Улсын Ерөнхийлөгч, Эрхэм хүндэт Дмитрий Анатольевич Медведев Танд гүн талархал илэрхийлье.
Халхын голын байлдааны ялалт бол Монгол Улсын тусгаар тогтнол, бүрэн эрхт байдал, монголын ард түмний эрх чөлөөг хамгаалахын төлөө, нийтийн дайны эсрэг хийсэн хамтын тэмцлийн нандин түүх мөн. Энэ ялалтанд хүрэхэд ЗХУ, оросын ард түмний зүгээс үзүүлсэн цэрэг-техникийн тусламж шийдвэрлэх үүрэг гүйцэтгэснийг монголын ард түмэн хэзээ ч мартахгүй.
Өнгөрсөн зууны 30-аад оны төгсгөлд өрнөсөн Халх голын байлдаан болон бусад үйл явдлууд хүн төрөлхтөний түүхэнд хамгийн их гай гамшиг тарьсан дэлхийн II дайнд хүргэсэн түүхийг бид мэднэ. Энэ дайнд холбоотны цэрэг ялалт байгуулахад тэр үеийн ЗХУ шийдвэрлэх үүрэг гүйцэтгэснийг ч бид бас мэднэ. Ялангуяа энэ дайнд ЗХУ ялагч болсноор тэр үеийн БНМАУ-ын тусгаар тогтнол, бүрэн эрхт байдал жинхэнэ ёсоороо хэрэгжих бодит нөхцөл бүрдсэнийг бид мартах учиргүй. Иймээс дэлхийн II дайны үр дүнг гуйвуулах гэсэн аливаа оролдлогыг Монгол Улс шийдвэртэй няцаах болно.
Дөнгөж сая ОХУ-ын Ерөнхийлөгч Д.А.Медведев бид хоёр Халх голын байлдааны түүхт ялалтыг гардан зохион байгуулж, удирдсан аугаа жанжин Георгий Константинович Жуковын хөшөөнд гүн хүндэтгэлээ илэрхийлээд ирлээ. Үүгээр бид хатуу ширүүн тэмцэлд амь биеэ үл хайрлан оролцож явсан монгол, оросын жирийн цэрэг эрс, энэхүү ялалтыг авчрахын төлөө хөлс хүчээ шавхан ажиллаж байсан жирийн хөдөлмөрчин иргэдийнхээ байгуулсан гайхамшигт гавъяаг цагийн урсгал, түүхийн нугачаанд үнэ цэнийг нь бууруулалгүй үеийн үед нандигнан хүндэтгэж явахаа илэрхийлэхийг зорьсон юм.
Эрхэм хүндэт ахмад дайчид аа
Монгол орны тусгаар тогтнол, бүрэн эрхт байдлыг батлан хамгаалахын төлөө халуун амь, бүлээн цусаа үл хайрлан баатарлаг гавъяа байгуулж, амь насаа зориулсан монгол, зөвлөлтийн дайчид, түүнчлэн өдгөөг хүртэл бидэнд үлгэр дууриал, амьд түүх болж яваа азай буурал ахмад дайчид Та бүхэндээ Монгол Улсын Ерөнхийлөгч, Зэвсэгт хүчний Ерөнхий командлагчийн хувьд гүн хүндэтгэл илэрхийлье. Халхын голоос 1939 онд гэртээ буцаж ирээгүй монгол, орос цэрэг эрсийн гэгээн дурсгал монголын ард түмний сэтгэл зүрх, Халхын голд мөнхөд хадгалагдан үлдэх учиртай.
Тэртээ 70 жилийн өмнөх байлдаанд Монголын анхны нисгэгчид-зоригт шонхруудыг манлайлан байлдаж явсан Дугарын Гунгаа гуайд “Монгол Улсын Баатар” хэмээх эрхэм дээд алдар цолыг хүртээж байгаа нь түүнтэй мөр зэрэгцэн тэмцэж явсан алдарт жанжин, эрэлхэг баатруудынхаа байгуулсан түүхэн гавъяаг Монголын төр, ард түмэн хүндэтгэж үеийн үед дурсан санаж явдгийн баталгаа юм.
Эх орноо батлан хамгаалах ариун үйл хэрэгт оруулсан үе үеийн цэрэг эрсийн гавъяа, сэтгэл зүрх ард түмний дунд улам бүр алдаршиж байна. Тийм ч учраас ахмад дайчиддаа үзүүлэх хүндэтгэл, халамж манай төр засгийн анхаарлын төвд явж ирсэн уламжлалтай.
Ажил, амьдралын арвин баялаг туршлагаа үр ач, залгамж хойч үедээ өвлүүлэн, төр, түмэн олондоо түшиг тулгуур болж, эрүүл энх, аз жаргалтай, урт удаан наслахын өлзийтэй сайхан ерөөлийг ахмад дайчид Та бүхэндээ өргөн дэвшүүлье.
Анхаарал тавьсанд баярлалаа.
