Монгол Улсын Ерөнхийлөгчийн эвээл дор алдарт эхийн одонтой 1000 ээжийн чуулган төрийн ордонд гуравдугаар сарын 8-нд болов. Тус чуулганд нийслэлийн төдийгүй аймгуудаас олон төлөөлөгч ирсэн байлаа. Чуулганд Монгол Улсын Ерөнхийлөгч Ц.Элбэгдорж мэндчилгээ ирүүлснийг Эрүүл мэндийн сайд С.Ламбаа уншин сонсгов.
Мэндчилгээнд “Алдарт Эхийн Одонт Ээжүүдийн холбоо”- ноос уламжлал болгон зохиодог энэхүү чуулганд оролцож байгаа алдарт эхчүүд Та бүхэндээ болон эх орныхоо өнцөг булан бүрт суугаа мянга мянган ээжүүддээ “Олон улсын эмэгтэйчүүдийн эрхийг хамгаалах өдөр”-ийн халуун мэндчилгээг дэвшүүлж байна.
Та бүхэн маань Монгол орныхоо хөгжил дэвшил, үр хүүхдийнхээ сайн сайхны төлөө өөрийн биеийн алжаалыг үл хайхран зүтгэж, уйгагүй хөдөлмөр, уужуу талбиу ухаанаараа улс гүрэн, ураг бүлийнхээ түшиг тулгуур болж ирсэн билээ.
Нийгмийн хөгжилд эмэгтэйчүүдийн оролцоо нь туйлын чухал бөгөөд хүн амын өсөлт, улс орны хөгжил, ирээдүй хойч үе чухамхүү эхчүүдээс хамаардаг.
Миний бие шинэ он гарах торгон агшинд Монгол түмэнтэйгээ сүү өргөн мэндчилж, “Архигүй Монголын төлөө хамтдаа” уриалгыг дэвшүүлсэн билээ. Энэхүү уриалгыг Монголын эхчүүд сэтгэл хөдлөн халуун дотноор хүлээн авч, архигүй Монголын төлөө өөрсдөөрөө үлгэрлэн нэгдсээр байна.
Буянт ээжүүд та бүхэндээ улс гүрнийхээ мандал бадралын галыг хөгжөөж, төрдөө түшигтэй, түмэн олондоо хүндтэй, жаргалын дээдийг эдлэн, амар амгалан амьдрахын өлзийтэй ерөөлийг өргөн дэвшүүлье.
Монголын мянга мянган эхчүүдийг Мөнх хөх тэнгэр ивээх болтугай” гэжээ.
