Булган аймгийн шүүх, прокурорын ажилтай танилцлаа
Монгол Улсын Ерөнхийлөгч Ц.Элбэгдорж орон нутаг дахь томилолтоо Булган аймагт үргэлжлүүлж байна. Тэрээр Булган аймагт ирэнгүүтээ аймгийн шүүх, прокурорын үйл ажиллагаатай танилцлаа.
Булган аймгийн шүүх 34 хүний орон тоотой ажиллаж байна.Бусад орон нутгийн шүүхийн жишгээр үйл ажиллагаагаа ил тод нээлттэй болгох ажлыг эхлүүлээд байна. Шүүхийн вэб сайт дээр бүх шийдвэр, шүүхээс гарч буй бусад хууль эрх зүйн баримт бичгүүдийг байрлуулж, мөн холбогдох хууль дүрэм тавигджээ.Тус аймгийн шүүхийн вэб сайт харьцангуй хандалт өргөнтэй байна. 2011 он гарсаар 28000 гаруй хүн цахим хуудаснаас шүүхийн үйл ажиллагаатай танилцжээ. Тус шүүх хүүхдийн өрөө ажиллуулж байна. Энэ нь гэмт хэрэгт холбогдсон болон сэжиглэгдсэн хүүхдэд сэтгэлзүй, хууль эрх зүйн зөвлөгөө өгөх зорилготой юм гэж Ерөнхий шүүгч Ё.Нямцэрэн танилцууллаа.
Монгол Улсын Ерөнхийлөгч хэлэхдээ “Хууль хяналтын байгууллагын үндсэн үүрэг нь иргэний эрх ашгийг хамгаалах явдал юм. Өөрөөр хэлбэл шүүхийн шийдвэр нь хуулийг зөрчихгүй байгаа энгийн олон хүний эрхийг хамгаалж байна гэсэн үг. Тийм учраас та бүхний шийдвэр хуулийн дагуу хүний эрхийг хүндэтгэсэн зөв шударга байх ёстой. Та бүхний шийдвэр ийм гарч байгаа гэдэгт олон нийт ч итгэл дүүрэн байх ёстой. Шүүх үйл ажиллагаагаа ил тод байлгана гэдэг туйлын чухал юм” гэлээ.
Булган аймгийн шүүх, прокурорын ажилтай танилцлаа
