Үндэсний хороо байгууллаа
Монгол Улсын Ерөнхийлөгч зарлиг гаргаж, Нийслэлийн агаарын бохирдлыг бууруулах тухай хуулийн 9 дүгээр зүйлд заасан Нийслэлийн агаарын бохирдлыг бууруулах бодлогын хэрэгжилтийг зохицуулах, үйл ажиллагааны харилцан уялдааг хангахад хяналт тавих үүрэг бүхий Нийслэлийн агаарын бохирдлыг бууруулах Үндэсний хороог байгууллаа.
Үндэсний хороог Ерөнхийлөгчийн Тамгын газрын дарга толгойлж, орлогч даргаар нь Нийслэлийн Засаг дарга, УИХ-ын Агаарын бохирдлыг бууруулах дэд хорооны дарга нар ажиллана. Гишүүдэд Сангийн яам, Байгаль орчин, аялал жуулчлалын яам, Зам, тээвэр, барилга, хот байгуулалтын яам, Эрдэс баялаг, эрчим хүчний яамны Төрийн нарийн бичгийн дарга нар, Мэргэжлийн хяналтын ерөнхий газар, Стандарт хэмжил зүйн газар, Цагдаагийн ерөнхий газар, Эрчим хүчний газрын дарга зэрэг 18 хүн оржээ.
Үндэсний хороо нь нийслэлийн агаарын бохирдлыг бууруулах талаарх бүх төсөл, хөтөлбөрийг уялдуулан зохицуулах, төлөвлөгөө, хөрөнгийн эх үүсвэрийг нэгтгэх, зарцуулалтыг хянах, үр дүнг тооцон дүгнэх бөгөөд заавал биелэх шийдвэрийг тогтоол хэлбэрээр гаргана.
Үндэсний хороо ажлаа УИХ, Ерөнхийлөгчийн өмнө хариуцан улирал бүр тайлагнана. Шаардлагатай гэж үзвэл Засгийн газар, ҮАБЗ-д асуудал оруулна.
Дүүрэг бүрт тухайн дүүргийн Засаг даргаар ахлуулсан салбар хороотой ажиллах юм байна.
Үндэсний хороо байгууллаа
