Ерөнхийлөгч Багануур дүүрэгт ажиллав
Монгол Улсын Ерөнхийлөгч Ц.ЭЛБЭГДОРЖ нийслэлийн Багануур дүүрэгт ажиллалаа.
Эхлээд Багануурын нүүрсний уурхайн ажил байдалтай танилцаж, тулгарч байгаа асуудлуудыг шийдэх арга замын талаар холбогдох албаны хүмүүстэй ярилцав.
“Багануур” нь Монгол Улсын нүүрсний хэрэглээний 45 хувийг дангаараа хангадаг, дүрмийн сангийн 75%-ийг төр, 25%-ийг хувь хүн, байгууллага эзэмшдэг төрийн өмч давамгайлсан хувьцаат компани юм. Олон хүчин зүйлээс болж компани ашигтай ажиллаж чадахгүй байна. Тухайлбал нэг тонн нүүрсийг 18 мянган төгрөгөөр борлуулж байгаа. Түүхий эд, түлш сэлбэг материалын өөрчлөлтийг харгалзан нүүрсний үнийг тодорхойлох аргачлалын дагуу үнийг тооцоход нэг тонн нүүрсний үнэ 21300 төгрөг байвал өртгөө нөхөн алдагдалгүй ажиллаж, үйлдвэрлэлийн үйл ажиллагаа хэвийн явагдах болно, иймд үнийг дээрх хэмжээнд тогтоох асуудлыг яаралтай шийдвэрлэх шаардлагатай байна гэж уурхайн удирдлага танилцууллаа.
Дулааны цахилгаан станцуудаас авах нүүрсний авлага 2011 оны 1-р сарын 1-ний байдлаар 11.5 тэрбум төгрөгт хүрчээ. Борлуулсан нүүрсний төлбөр бүрэн төлөгдөхгүй байгаагаас дизель түлш, тэсэлгээний материал авах, засвар хийж чадахгүйд хүрч үйлдвэрлэлийн ажиллагаа доголдох аюул нүүрлэсэн байна.
“Монгол нүүрс” төслөөр авсан үндсэн зээл, зээлийн хүүг эргүүлэн төлөхөд жил бүр 3.2-3.8 сая ам.доллар шаардлагатай бөгөөд алдагдалтай ажиллаж байгаагаас төлж чадахгүй, өнөөдрийн байдлаар 6.8 сая ам.долларын хугацаа хэтэрсэн өглөгтэй болжээ. Төрөөс нүүрсний үнийг барьж байгаа нөхцөлд санхүүгийн чадавхи сайжрахгүй тул цаашид зээл, зээлийн хүүг төлөх боломжгүй юм гэж уурхайнхан хэллээ. \ Нийт 63.4 сая ам.долларын зээл, зээлийн хүүгийн төлбөртэй байна\
Техник тоног төхөөрөмжийн талаар ч санаа зовоох, дэмжлэг хүссэн асуудал цөөнгүй байгаа юм байна. Төвийн бүсийн нүүрсний хэрэгцээг найдвартай хангахын тулд 2011-2015 онд жил бүр 30 орчим тэрбум төгрөгийн парк шинэчлэл хийх шаардлагатай боловч санхүүгийн хүндрэлээс шалтгаалан өөрийн хөрөнгөөр санхүүжүүлэх боломжгүй болжээ. Эхний ээлжинд 13.9 тэрбум төгрөгийн тоног төхөөрөмжийн шинэчлэл хийх зайлшгүй шаардлага байна гэж инженерүүд ярьж байв.
“Тоног төхөөрөмж , бараа бүтээгдэхүүний нийлүүлэлт дээр зардал өсөөд нэмэгдээд байдагт дүгнэлт хийх хэрэгтэй. Хичнээн хөрөнгө оруулалт орж ирээд, нийлүүлэлтэд гардаг зардлыг багасгахгүй бол ямар ч нэмэргүй. Нүүрсний уурхай, цахилгаан станцууд ашиггүй ажиллаж байна гээд эцсийндүндээ хэрэглэгчийн нуруун дээр үнэ нэмэгдэж буух гээд байдаг. Түлш эрчим хүчний энэ бүтцийг ч задлах хэрэгтэй гэж бодож байна. Төрийн өмчийг хариуцаж байгаа хүмүүс менежментээ сайжруулах хэрэгтэй” гэж Ерөнхийлөгч хэллээ.
Баригдахаар төлөвлөж байгаа 5-р цахилгаан станцыг Багануурын нүүрсний уурхайг түшиглэн барих, уг станцын нүүрсийг зуун хувь Багануурын уурхай дангаара хангах нь эдийн засгийн давхар ач холбогдолтой болох талаар энэ уулзалтын үеэр ярилцлаа.
Дараа нь Ерөнхийлөгч Багануур дүүргийн иргэдтэй уулзалт хийлээ. Уулзалтад ХХААХҮ-ийн сайд Т.Бадамжунай, дэд сайд Х.Золжаргал, Ерөнхийлөгчийн зөвлөх Л.Эрхэмбаяр, Р.Болд , Нийслэлийн засаг дарга Г.Мөнхбаяр нар оролцож иргэдийн асуултад хариуллаа.
Үүгээр МУ-ын Ерөнхийлөгчийн зүүн аймгуудад ажилласан томилолт өндөрлөв. Ерөнхийлөгч орон нутаг дахь томилолтоо 2011 оны 3 дугаар сар 9-өөс Булган, Хөвсгөл аймгуудад үргэлжлүүлэх болно.
Ерөнхийлөгч Багануур дүүрэгт ажиллав
