Дорнод аймгийн Халх гол суманд загвар аж ахуй байгуулна
Халх гол сум зөвхөн Дорнод аймгийнхаа төдийгүй Зүүн хойд Азийн бүсийн эдийн засгийн чухал бүс болох ирээдүй бий.
Монгол Улсаас тавьсан саналын дагуу БНСУ-ын КОИКА байгууллага Халх голын бүс нутагт хөдөө аж ахуйг сэргээн хөгжүүлэх мастер төлөвлөгөөг 2008 оноос хэрэгжүүлж эхэлжээ. Халх голын бүс нутагт 270 мянган га талбайг хамруулан хөдөө аж ахуйг сэргээн хөгжүүлэх иж бүрэн судалгаа хийж, мал аж ахуй, газар тариалан хосолсон загвар аж ахуй байгуулах зураг, төлөвлөгөөг бэлэн болгосон байна. Энэ хүрээнд хийгдсэн зураг төсөлд тулгуурлан Халх гол суманд загвар аж ахуй байгуулах төслийг КОИКА байгууллага хийжээ.
Монгол Улсын Ерөнхийлөгч Ц.Элбэгдорж Дорнод аймагт ажиллах үеэрээ Халх гол суманд загвар аж ахуй байгуулах төслийн явцтай танилцаж, гэрээнд гарын үсэг зурах ёслолын ажиллагаанд оролцлоо.
1970 оноос эхлэн энэ бүс нутагт газар тариалан эрхэлж байсан туршлагатай ч, зах зээлийн эдийн засагт шилжих үеэр хөдөө аж ахуй нь зогсонги байдалд оржээ. Харин одоо энд атаршсан болон судлагдсан нөөц атар газрыг эзэмшин, 4 сая долларын хөрөнгө оруулалт хийж, 2011 -2019 онд гурван үе шаттайгаар төслийг хэрэгжүүлэх юм байна. Төслийн хүрээнд мах, сүүний үхрийн ферм, гахайн ферм, хүлэмж, усалгааны систем, сүү боловрсуулах цех, агуулах зоорь баригдахаас гадна хүнсний ногоо, ногоон тэжээл тариалдаг мал аж ахуй, газар тариалан хосолсон орчин үеийн цогцолбор босох юм.
“Загвар аж ахуйг байгуулснаар энэ суманд 3 мянга орчим ажлын байр шинээр бий болно. Аж ахуйг дагаад цэцэрлэг сургууль баригдана. Буйр нуурыг түшиглээд аялал жуулчлал хөгжих боломжтой. Бидний хийж байгаа тооцоогоор Халх голын бүс нутагт байгуулах аж ахуй жилд 864.5 тэрбум төгрөгийн бүтээгдэхүүн үйлдвэрлэж, 35.8 тэрбум төгрөгийн орлогыг улсын төсөвт оруулна” гэж КОИКА-ийн Монгол дахь суурин төлөөлөгч Ли Дунг Гү танилцууллаа.
Ерөнхийлөгч Ц.Элбэгдорж төслийн явцтай танилцсаныхаа дараа анхаарах шаардлагатай хэд хэдэн асуудал байгааг хэлэв.
Тэрээр “ Энэ бол Монгол , Өмнөд Солонгос улсуудын хамтран хэрэгжүүлж байгаа хамгийн бодитой төсөл. Уул уурхай, ашигт малтмалаас гадна өөр бусад эдийн засгийн чухал ач холбогдолтой салбар байдаг гэдгийг энэ төсөл бидэнд харуулах учиртай. Хамгийн гол нь нутгийн иргэдтэй ойлголцож, асуудлаа хэлэлцүүлж, саналы нь авч, тэднийг хамруулж төслөө хэрэгжүүлэх хэрэгтэй. Мөн хувийн хэвшлийн оролцоо чухал гэдгийг онцолмоор байна. Төр хувийн хэвшлийн хамтын ажиллагааны үлгэр жишээ болж ажиллаарай. Энэ төсөл орон нутгийн аж ахуйнуудын хувьд бизнесээ өргөтгөх сайхан боломж юм. Зүүн хойд Азийн, улмаар Ази Номхон далайн эдийн засгийн хөгжилд монголчууд Халх голын төслөөр дамжуулан хувь нэмрээ оруулж байна гэсэн үг. Төмөр зам, автозам тавигдахыг хүлээлгүй , цаг алдалгүй ажлаа эхлүүлцгээе” гэлээ.
Дорнод аймгийн Халх гол суманд загвар аж ахуй байгуулах төслийн гэрээнд ХХААХҮ-ийн сайд Т.Бадамжунай, КОИКА байгууллагын Монгол дахь суурин төлөөлөгч Ли Дунг Гү нар гарын үсэг зурав.
Дорнод аймгийн Халх гол суманд загвар аж ахуй байгуулна
