Ерөнхийлөгч Ц.Элбэгдорж Архангай аймгийн Цэцэрлэг хотод ажиллах үеэрээ улсын тэргүүний “Од-Кр” хоршооны үйл ажиллагаатай танилцлаа. Хүмүүс хоршиж, хамтын хөдөлмөрөөрөө бизнес хийвэл амжилт олдог гэдгийг хоршоо, хуримтлалын бүлгүүдийн үйл ажиллагаа харуулдаг бөгөөд “Од-Кр” бол тэдгээрийн нэг юм. 43 жил агрономичоор ажилласан С.Янжинлхам 2001 оноос эхлэн 13 гишүүн элсүүлж хоршоогоо байгуулжээ. Төмс, хүнсний ногоо тариалах, боловсруулах, ногооны зоорь барих, жимс бут тариалах, зөгийн аж ахуй эрхлэх чиглэлээр уг хоршоо ажиллаж байна.
Жижиг, дунд үйлдвэрийг дэмжих төслөөс 10 сая төгрөг авч үйл ажиллагаагаа эхэлж байсан бол өнөөдөр аймгийн төвийн хүнсний ногооны хэрэгцээний 40 хувийг хангадаг болжээ. Өнгөрсөн жил хоршоо өөрийн хөрөнгөөр байртай болсон байна.
“Төмсний үрийг шинэчилж, сумдыг төмсний үрээр хангаж, өндөр уулын бүсийн онцлогт таарсан ногоо хадгалах нүхэн зоорь хийх арга нэвтрүүлэх зэргээр ажилласан тул улсын тэргүүний хоршоо болсон” гэж тус хоршооны захирал С.Янжинлхам ярив. Зэргэлдээх аймгуудад энэхүү нүхэн зоорийг барьж, хэрэглээнд өргөн ашигладаг болсон байна.
“Од-кр” хоршоо хөдөөгийн ядуурлыг бууруулах хөтөлбөрийн дэмжлэгээр ногоо боловсруулж, салат хийж савлах жижиг цех ажиллуулж байна. Бүтээгдэхүүн нь чанартай эрэлт ихтэй болжээ.
Ерөнхийлөгч уг хоршооны үйл ажиллагаатай танилцсаныхаа дараа “Хүмүүс санаачилгатай ажиллаж хөдөлмөрлөхөд амьдрал ахуй сайжрах боломж олон байна гэдгийг энэ хоршооны жишээ харуулж байна. Төр засаг ажил хийж байгаа хүнээ дэмжих бодлого хэрэгжүүлж байгаа. Энэ бодлогын үр дүн танай хоршооноос харагдаж байна” гэлээ.
