Баянхонгор аймгийг төдийгүй баруун таван аймгийг хүнсээр хангаж байгаа, 3 мянга орчим хүний амьжиргааны эх үүсвэр болсон “Баянхонгор” баруун бүсийн худалдааны төв бол тус аймгийн бахархах бүтээн байгуулалтын нэг юм. Ерөнхийлөгч Ц.Элбэгдорж Баянхонгор аймагт ажиллах үеэрээ тус худалдааны төвтэй танилцаж, иргэд хөдөлмөрчидтэй уулзан санал солилцлоо.
Баруун бүсийн худалдааны төвийг 2008 онд нутагтаа чуулсан бизнес эрхлэгчдийн санаачилгаар 2 тэрбум төгрөгөөр барьж босгожээ. Худалдаа наймаа эрхэлдэг хүмүүс тухтай, дулаан орчинд ажилладаг юм байна. Нутгийн иргэд төдийгүй зэргэлдээх аймгийн худалдан авагчид ч энд зорьж ирж, хэрэгцээгээ хангах болсон байна. 6 мянга орчим м.кв талбайд 700 гаруй түрээслэгч, сарын 50 орчим мянган төгрөгийн түрээсээр арилжаагаа эрхэлж байна. Талбайн гуравны нэг нь хүнс, бусад нь ахуйн бараа бүтээгдэхүүний худалдаанд зориулагджээ.
Худалдааны төвийг барих төслийн хүрээнд барилгын материалын бага оврын үйлдвэр барьсан нь одоо ч ашигтай ажиллаж, сэндвичэн хавтан, вакум цонх хаалга зэргийг орон нутгийн төдийгүй зэргэлдээх аймгуудын захиалгаар үйлдвэрлэж байна.
“Хүнсээ зориулалтын агуулахад стандартын дагуу хадгалж байгаа учраас найдвартай, эрүүл, үнийн хувьд Улаанбаатрын үнээс илүү байлгахгүй байх бодлого барьж байна” гэж тус компанийн захирал Д.Жаргалсайхан ярив.
Нутгийн иргэд, бизнес эрхлэгчид болон Баянхонгороос гаралтай иргэдийн санаачилгаар хэрэгжүүлэхээр төлөвлөсөн бусад төслөө энэ үеэр танилцууллаа. Тухайлбал Хөдөө аж ахуйн бирж байгуулах, ноос ноолуур боловсруулах, угаах үйлдвэр барих, чацаргана, төмс хүнсний ногоо тарих төслүүдийг эхлүүлжээ.
Ерөнхийлөгчийг “Баянхонгор” баруун бүсийн худалдааны төвтэй танилцах үеэр нутгийн гаралтай хэсэг иргэд утааг бууруулах зорилгоор зохион бүтээсэн зуух, халаагуураа үзүүлэв. Уг зуух халаагуурыг “Номгон хайрхан” компанийн инженерүүд зохион бүтээжээ.
“Түлш хэрэглэдэггүй, цахилгаанаар халдаг, гэрийн зуух мэт хэлбэртэй, дулаан хадгалах чадвар өндөртэй хийн болон цахилгаан халаагуурыг багагүй цаг хугацаа гарган, олон туршилт хийж байж зохион бүтээлээ. Ингэснээр экологид ээлтэй бүтээгдэхүүн хийж хэрэглэх зорилтдоо хүрэх том ажил болсон” гэж тус компанийхан ярив.
