Монгол Улсын Ерөнхийлөгчийн Хүний эрх, иргэний оролцооны бодлогын зөвлөх Ч.Сосормаа Хууль зүй дотоод хэргийн яам, Цагдаагийн Ерөнхий газар, Нийслэлийн цагдаагийн газар, Шударга өрсөлдөөн, хэрэглэгчийн төлөө газрын удирдлагуудыг хүлээн авч уулзлаа.
Ерөнхийлөгчийн зөвлөх Ч.Сосормаа архидан согтуурахтай тэмцэх талаар Монгол Улсын Ерөнхийлөгчийн барьж буй бодлого, цаашид авч хэрэгжүүлэх арга хэмжээний тухай танилцуулав. Мөн Ерөнхийлөгчийн Тамгын газрын дэргэд “Архигүй Монголын төлөө хамтдаа” ажлын хэсэг байгуулагдаж байгааг дуулгасан юм.
Архидан согтуурахтай тэмцэхэд цагдаагийн байгууллагад тулгамдаж буй хүндрэл, хэрхэн хамтарч ажиллах талаар тэдний саналыг сонслоо.
Нийслэлийн цагдаагийн газрын дэд дарга С.Отгонбаатар Улаанбаатар хотын хэмжээнд архидан согтуурсантай холбоотойгоор үйлдэгдэж буй гэмт хэргийн тоо, архи, согтууруулах ундааны үйлдвэр, худалдан борлуулалт, түүгээр үйлчилж буй цэгүүд олширж буй талаар хийсэн судалгаагаа танилцуулав.
Уулзалтад оролцогчид санал солилцохдоо архидан согтуурахтай тэмцэх тухай хууль, хөтөлбөр, эрх зүйн орчныг бүхэлд нь сайжруулах шаардлагатайг онцлон хэлж байлаа.
Архидан согтуурахтай тэмцэхэд төр, төрийн бус байгууллагуудын оролцоог хангах, архины худалдан борлуулалт, түүгээр үйлчлэх цэгүүдийн тоо, ажиллах цагийн хуваар, үйлчилгээнд тавих хяналтыг сайжруулах боломжийн талаар ч ярилцав.
Шударга өрсөлдөөн, хэрэглэгчийн төлөө газраас архины ил болон далд, хөдөлгөөнт сурталчилгааг явуулахгүй байх, архины сурталчилгаанд олны танил хүмүүсийн тоглохыг эхний ээлжинд таслан зогсоох санал гаргалаа.
Цаашид архидан согтуурахтай тэмцэхэд төрийн цогц бодлого, хяналт үгүйлэгдэж байгааг оролцогчид хэлээд Ерөнхийлөгчийн гаргасан санал, санаачилгыг дэмжиж ажиллахаа илэрхийлэв.
