Өнөө жил төрийн золголтын журамд өөрчлөлт оруулсан тул төрийн ордонд цагаан сарын баярыг цомхон ёсолно. Энэ талаар Төрийн ёслолын албаны дарга А.Батсайханаас тодруулахад:
-Олон ахмад төр засгийн удирдлагуудтайгаа золгох хүсэлтээ ирүүлсэн. Тиймээс гурван ахмадтай золгодог байсныг өөрчлөн бэлгэдлийг бодож тоог нь 9 болгосон. Түүнээс гадна Ерөнхийлөгч, УИХ-ын дарга, Ерөнхий сайд олон айлаар явбал шинийн нэгэнд замын түгжрэл үүсгэж хүмүүсийг бухимдуулна. Үүнийг бодолцон Ерөнхийлөгч, УИХ-ын дарга, Ерөнхий сайд нар төрийн хүндэтгэлийн танхимд очиж ахмадуудтайгаа золгохоор зохицуулж байна. Бас хэвлэл, мэдээллийнхэнд нэг дороос сурвалжлахад ч дөхөмтэйг бодолцсон гэв.
Монгол Улсын Ерөнхийлөгч Ц.Элбэгдорж хоёрдугаар сарын 3-ны буюу шинийн нэгний өглөө 8 цагт төрийн есөн хөлт цагаан туганд хүндэтгэл үзүүлээд, төрийн ёслол хүндэтгэлийн өргөөнд очиход УИХ-ын дарга, Ерөнхий сайд ирж золгох юм байна.
Соёлын гавьяат зүтгэлтэн Ц.Цэрэндорж төрийн их хан хуурыг эгшиглүүлж, төмөр туулай жилийн өнгийг засан өргөөний жаврыг үргээж төр, түмэндээ өргөх магтаал туйлна.
Гандантэгчинлэн хийдийн хамба лам Д.Чойжамц, Дашчойлан хийдийн хамба лам Ч.Дамбажав нар төрийн ёслолын өргөөнд морилон ирж, Монгол Улсын Ерөнхийлөгч, УИХ-ын дарга, Ерөнхий сайд нартай золгоно.
Ерөнхийлөгч, УИХ-ын дарга, Ерөнхий сайд нар төрийн ёслол хүндэтгэлийн өргөөний “А” танхимд ахмадын төлөөлөлтэй очин золгож, гарын бэлгээ гардуулна.
