Монгол Улсын Ерөнхийлөгчийн “Архи хэрэглэдэггүй Монгол” уриалга гарсантай холбогдуулан архидан согтуурахтай тэмцэхэд төрийн бодлогын шинэчлэл, цаашид авах арга хэмжээний талаар санал солилцох зорилгоор өнөөдөр төрийн болон төрийн бус, олон нийтийн иргэний байгууллагууд хамтран нээлттэй хэлэлцүүлэг зохион байгуулав.
Уг хэлэлцүүлэгт Ерөнхийлөгчийн зөвлөх Ч.Сосормаа, Р.Болд, М.Батчимэг нар болон Дэлхийн зөн Монгол ОУБ-ын суурин төлөөлөгч Винсэнт Эдвардс, ДЭМБ-ын Суурин төлөөлөгчийн үүрэг гүйцэтгэгч Луо Дапенг болон төрийн болон, төрийн бус байгууллагуулдын төлөөлөгчид оролцлоо.
Энэхүү хэлэлцүүлгээр, “Архидан согтуурахтай тэмцэх тухай хуульд нэмэлт, өөрчлөлт оруулах тухай”, “Архидан согтуурахаас сэргийлэх, хяналт тавих үндэсний хөтөлбөрийн хэрэгжилт, цаашид шинэчлэн боловсруулах үзэл хандлагын талаарх санал”, “Архидалттай эдийн засгийн аргаар тэмцэхэд эрх зүйн орчинг боловсронгуй болгох тухай”, “ДЭМБ-аас гаргасан архины хор уршгийг бууруулах дэлхийн стратеги, чиг хандлага, олон улсын туршлага”-ын тухай, “Архи согтууруулах ундааны хэрэглээг бууруулах талаар монголын мянганы сорилтын сангийн эрүүл мэндийн төслийн хэрэгжүүлж буй үйл ажиллагаа”, “Архидалттай тэмцэх олон улсын туршлагууд, эрүүл мэндийг дэмжих сангууд”, “Архидан согтуурахтай тэмцэхэд төрийн бодлогын шинэчлэл, цаашид авах арга хэмжээний тухай” зэрэг сэдвүүдээр олон сонирхолтой илтгэлүүд тавигдсан байна.
