Төрийн зарим чиг үүргийг гэрээний үндсэн дээр төрийн бус байгууллагаар гүйцэтгүүлэх эрх зүйн орчинг боловсронгуй болгох асуудал сэдэвт нээлттэй хэлэлцүүлэг өнөөдөр Ерөнхийлөгчийн дэргэдэх “Иргэний танхим”-д боллоо. Хэлэлцүүлгийг Ерөнхийлөгчийн Тамгын газрын дарга Д.Баттулга нээж, Хууль зүй, дотоод хэргийн яам, Боловсрол, соёл, шинжлэх ухааны яам, Нийгмийн хамгаалал, хөдөлмөрийн яам, Эрүүл мэндийн яам, Байгаль орчин, аялал жуулчлалын яам, нийслэлийн Засаг даргын тамгын газар, Өвөрхангай, Өмнөговь аймгийн Засаг даргын тамгын газрын болон төрийн бус байгууллагуудын төлөөлөл оролцож, есөн илтгэл, мэдээлэл сонсож, саналаа хэлэв.
Хэлэлцүүлэгт оролцогсод төрийн хүнд ачааг хөнгөлөх, ажил үйлчилгээний чанар, хүртээмжийг дээшлүүлэхэд ийнхүү төрийн зарим чиг үүргийг төрийн бус байгууллагуудаар гүйцэтгүүлэх нь чухал ач холбогдолтойг онцлон дурьдаж байв. Гэхдээ төрийн бус байгууллагууд үүрэг, эрхийн нэгдлийг хангаж ажиллах ёстой. Гэрээгээр хүлээсэн ажил үүргээ биелүүлэхэд хүрэлцэхүйц төсөв, төрийн дэмжлэг, ажил, үйлчилгээний чанарыг хэмжих хэмжүүртэй байх хэрэгтэй. Мөн ТББ-ын хараат бус байдлыг хангах явдал чухал гэдгийг тэд тэмдэглэсэн юм.
Монгол Улсын Засгийн газрын тухай хуульд “Засгийн газар нь төрийн гүйцэтгэх байгууллагын тодорхой чиг үүргийг холбогдох хууль, түүнд үндэслэсэн Засгийн Газрын шийдвэр, гэрээний үндсэн дээр Засгийн газрын бус байгууллагад хариуцуулан гүйцэтгүүлж, холбогдох зардлыг бүрэн буюу хэсэгчлэн санхүүжүүлж болно. Төрийн гүйцэтгэх байгууллагын чиг үүргийг эрхлэн гүйцэтгэж, тэр тухайдаа улсын төсвөөс санхүүжиж байгаа байгууллага нь Засгийн газрын шийдвэрийг биелүүлж, уг ажлаа Монгол Улсын зохих сайдын өмнө хариуцна” гэсэн хэдий ч эрх, үүргээ шилжүүлэх заалт байдаггүй ажээ.
Төрийн захиргааны төв болон нутгийн захиргааны байгууллагын зарим чиг үүргийг төрийн бус байгууллагаар гүйцэтгүүлэх, тэдгээрт шилжүүлэхийн тулд нийтэд нь зохицуулах иргэний нийгмийн зөвлөл байгуулах, Төсвийн удирдлага санхүүжилтийн хуулийг өөрчлөх, эрх зүйн үндсийг тавих, ТББ-ын Их Хурал, Засгийн газартай харилцах механизм бий болгох шаардлагатай гэж үзэж байгаагаа оролцогчид хэлэв.
Нийгэмд тустай үйл ажиллагаа явуулж буй төрийн бус байгууллагуудыг магадлан итгэмжлэх замаар тухайн чиг үүргийг сайн гүйцэтгэж чадах эсэхийг тогтоох хэрэгтэй. Үүнд хүний нөөцийн чадамж, ТББ-ын тухайн салбарыг төлөөлөх чадавхи, туршлага, засаг захиргаа, нутаг дэвсгэрийн нэгжийг хамарсан байдал, хариуцлагатай, ил тод, шударга ажилладаг эсэхийг хамруулж үзэх нь чухал гэж оролцогчид ярилаа.
Хамгийн гол асуудлын нэг бол санхүүжилт юм. Үүнийг шууд, тэтгэлэгт хөтөлбөр, худалдан авалт, нөхөн төлбөр олговор, төрийн өмчийг ашиглуулах, эрх шилжүүлэх хэлбэрээр зохицуулж болох юм байна. Нийгэмд тустай үйл ажиллагаанд нь нутгийн өөрөө удирдах байгууллага, төрийн бус байгууллага, хувийн хэвшил, спорт клубүүд /ашгийн бус үйл ажиллагаа явуулах тохиолдолд/, нийгмийн үйлчилгээний сүлжээ, сүм, хийд, буяны байгууллага байж болно. Харин улс төрийн нам, түүнээс байгуулсан сан, ажил олгогчдын байгууллага, үйлдвэрчний эвлэл, мэргэжлийн байгууллага оролцож болохгүй гэж ч нэгэн илтгэгч хэллээ.
Иргэний нийгмийн зөвлөл нь иргэний нийгмийн, төрийн болон нутгийн өөрөө удирдах байгууллагын төлөөлөгчдөөс бүрдэнэ. Тус зөвлөл төр, нутгийн өөрөө удирдах байгууллага, иргэний нийгмийн түншлэлийг хөгжүүлэх, нийгэмд тустай үйл ажиллагааны стратегийг тодорхойлох, иргэний нийгмийн, хувийн хэвшлийн, нутгийн өөрөө удирдах байгууллагаар төрийн үүргийг гүйцэтгүүлэх санал боловсруулах, хамтын ажиллагааг зохион байгуулах, нийгэмд тустай үйл ажиллагааны үр дүнг үнэлэх, төрийн бус байгууллагыг магадлан итгэмжлэх үүрэгтэй байж болно гэж оролцогсод үзэв.
