Монгол Улсын Ерөнхийлөгчийн Тамгын газар, ҮАБЗ-ийн ажлын алба хамтран “Газар хөдлөлтийн гамшгаас урьдчилан сэргийлэх, хот байгуулалт, төлөвлөлтийг боловсронгуй болгох асуудал” сэдэвт хэлэлцүүлгийг өнөөдөр иргэний танхимд зохион байгууллаа. Хэлэлцүүлгийг нээж, Ерөнхийлөгчийн Тамгын газрын дарга Д.Баттулга үг хэлэв.
Тэрээр хэлэхдээ “Оны эхээр Монгол Улсын Ерөнхийлөгчийн санаачилгаар газар хөдлөлтийн гамшгаас урьдчилан сэргийлэх, эрсдлийг бууруулах, хот байгуулалт, төлөвлөлтийг боловсронгуй болгох асуудлыг нухацтай хэлэлцэж, гуравдугаар сард Үндэсний аюулгүй байдлын зөвлөлийн хуралдааны зөвлөмж, тэмдэглэл гаргасан билээ. Өнгөрсөн хагас жил гаруйн хугацаанд бид хүлээсэн үүрэг даалгаврын хүрээнд багагүй ажил хийлээ. Юуны өмнө Гамшгийн үед хэрэгжүүлэх арга хэмжээний төлөвлөгөөг холбогдох байгууллагуудын оролцоотойгоор боловсруулсан нь газар хөдлөлт гэлтгүй бүх нийтийг хамарсан, учирч болзошгүй гамшгийн үед төрийн байгууллагууд бие даан шийдвэр гарган, асуудлыг богино хугацаанд бага гарз хохиролтойгоор даван туулах, гамшгийн дараах бүтээн босголт, сэргээн засварлах ажлыг зохион байгуулах боломж бүрдэнэ гэж үзэж байна. Үндэсний аюулгүй байдлын шинэчилсэн үзэл баримтлалд “Нийслэлийн хүн амын төвлөрлийг тараан байршуулах зорилгоор дагуул хотуудыг төлөвлөж, хот орчмын бүс нутгийг өндөр хурдны авто зам, эрчим хүч, инженерийн барилга байгууламжаар найдвартай хангаж холбоно”, “Орон сууц үйлдвэрлэл, үйлчилгээний барилга, инженерийн байгууламжийн газар хөдлөлтийн тэсвэрлэлтэд үнэлгээ өгч, 8 баллын газар хөдлөлтийг тэсвэрлэх шаардлага хангахгүй барилга, байгууламжийг хүчитгэх, буулгаж шинээр барих зохицуулалт хийнэ”, “Их дээд сургуулиудыг хотын төвөөс нүүлгэн шилжүүлж хотхон болгон хөгжүүлэх”, “Улаанбаатар хотын авто замын 1, 2, 3 дугаар тойрог замыг шинээр бий болгох, тойрог замыг холбосон туслах зам, хотын алслагдсан дүүрэг, шинээр баригдсан орон сууцны цогцолбор хорооллуудыг холбосон авто зам барих, шинэчлэн сайжруулах, ...” зэрэг арга хэмжээг тусгасан. Шинэ бүтээн байгуулалт хөтөлбөрт хамрагдсан нийт арга хэмжээг 2010-2016 оны хооронд хэрэгжүүлэхэд шаардлагатай хөрөнгийг 18.2 их наяд төгрөг гэж тодорхойлон, Засгийн газарт тусгай төлөвлөгөөний дагуу хэрэгжүүлэх үүрэг өгсөн байна. Өөрөөр хэлбэл бид гаргасан шийдвэрээ хэрэгжүүлэх бодитой арга хэмжээг авч эхлээд байна. Өнөөдрийн энэ хэлэлцүүлэгт мэргэжлийн хүмүүсийг урьсан. Та бүхнийг хэлэлцүүлэгт идэвхтэй оролцохыг хүсч байна” гэв
Хэлэлцүүлэгт нийслэлийн Барилга, хот байгуулалтын газрын дарга, Улаанбаатар хотын ерөнхий архитектор Э.Хүрэлбаатар “Улаанбаатар хотын барилгажилт ба суурьшлын шинэ бүс”, Барилга хот байгуулалтын газрын ерөнхий инженер Т.Эрдэнэтуяа “Улаанбаатар хотын барилга байгууламжийн газар хөдлөлтөд тэсвэрлэх байдалд хийсэн үнэлгээ, паспортжуулах ажлын үр дүн”, нийслэлийн Авто замын газрын дарга Д.Од “Нийслэлийн авто замын дунд хугацааны төлөвлөлт”, Сангийн яамны төсвийн бодлогын газрын дарга Б.Батжаргал “Шинэ бүтээн байгуулалт” хөтөлбөрийн санхүүжилт, хэрэгжих боломж”, Зам, тээвэр, барилга, хот байгуулалтын яамны Төрийн нарийн бичгийн дарга Ж.Бат-Эрдэнэ “Хот байгуулалт, төлөвлөлтийн эрх зүйн орчныг боловсронгуй болгох асуудал” сэдвээр тус тус илтгэл тавьж, Монгол Улсын шадар сайд М.Энхболд, нийслэлийн Засаг даргын орлогч Б.Мөнхбаатар, Мэргэжлийн хяналтын ерөнхий газрын дэд дарга Гүньбазар, Онцгой байдлын ерөнхий газрын дарга Ц.Амгаланбаяр, МСӨХ-ны Дээд зөвлөлийн ерөнхийлөгч Б.Жигжид, ШУА-ийн дэд ерөнхийлөгч Т.Дорж, иргэн Ш.Отгон-Өлзий нарын зэрэг олон хүн үг хэлж, оролцогчдын асуултад холбогдох хүмүүс хариулт өглөө.
Үг хэлсэн хүмүүс төрийн болон хувийн хэвшлийн байгууллагуудын хоорондын ажлын уялдаа муу, газар хөдлөлтөд бэлэн биш, хүн амьдарч, ажиллаж болохгүй гэсэн дүгнэлт гаргасан барилгуудыг нураах эрх зүйн орчин бүрдээгүй, стандарт, шаардлага хангаагүй олон барилга шинээр баригдсан, барилгын материалын судалгаа орхигдсон, барих явцад хяналт шалгалт сул, орон сууцыг паспортжуулахад нэн чухал бөгөөд барилгын тэсвэрлэлт, бэх батыг тодорхойлох багажны нийлүүлэлт хэдэн сараар хоцорч дөнгөж эхний хэсэг орж ирж байгаа зэргийг дурьдан баримтаар өгүүлэв.
Хэлэлцүүлгийг хааж Ерөнхийлөгчийн Үндэсний аюулгүй байдлын бодлогын зөвлөх М.Батчимэг хэлэхдээ “Мэргэжлийн хүмүүстэй мэдээлэл солилцлоо, асуудлаа шийдвэрлэх арга замын тухай ярилцлаа. Ажлын уялдааг сайжруулах асуудлыг нэлээд ярьж байна. Хууль эрх зүйн зохицуулалт хийх, төлөвлөгөөгөө сайжруулах хэрэгтэй юм байна. Санхүүжилтийн асуудал их чухал байна. Газар хөдлөлтийн бичил бүсчлэлийн зураг гаргалгүйгээр паспортжуулах асуудлыг шийдвэрлэхэд бэрхшээлтэй болох юм байна. Ажлаа хүн рүүгээ хандуулж чадахгүй байна. Хэлэлцэж буй зүйл маань зөвхөн хотын асуудал биш тул Мэргэжлийн хяналтын ерөнхий газар, Онцгой байдлын ерөнхий газар, иргэд хамтран оролцох, мэргэжилтэн сургаж бэлтгэх талаар ярилцлаа. Үндэсний аюулгүй байдлын үзэл баримтлалд эдгээр асуудал тодорхой хэмжээнд туссан байгаа. Тиймээс ажил төрөлдөө тусгаж ажиллаасай гэж бодож байна. Мөн иргэдийнхээ дуу хоолойг сонсож, хариуцлагын тогтолцоог бий болгоход анхаарах шаардлагатай юм байна” гэлээ.
