Монгол Улсын Ерөнхийлөгч Афганистаны асуудлаарх НАТО-гийн дээд хэмжээний уулзалтад оролцохоор Лисбон хотноо хүрэлцэн ирлээ
Монгол Улсын Ерөнхийлөгч Цахиагийн Элбэгдорж Япон Улсад хийсэн төрийн айлчлалаа өндөрлөөд 2010 оны 11 дүгээр сарын 20-нд /өнөөдөр/ Португал Улсын нийслэл Лисбон хотноо хүрэлцэн ирлээ.
Өнөөдөр Афганистан дахь олон улсын ажиллагаанд Монгол Улс цэрэг илгээгч орон гэдгээ албан ёсоор хүлээн зөвшөөрүүлээд байна.Монгол Улсын Ерөнхийлөгч Ц.Элбэгдоржийг дагалдан УИХ-ын гишүүн, Батлан хамгаалахын сайд Л.Болд Афганистаны асуудлаар анх удаа болж буй энэ удаагийн уулзалтад оролцох гэж байгаа юм.
НАТО-гийн улс төрийн шийдвэр гаргах үндсэн бүтэц болох Умард Атлантын зөвлөлийн энэ уулзалт гишүүн орнуудын төр, засгийн тэргүүн нарын түвшинд буюу дээд хэмжээнд болдгоороо онцлогтой юм. Ийм уулзалтаар гол төлөв холбоотны дотоод улс төр, стратегийн ач холбогдол бүхий үйл ажиллагаа болон бусад түнштэй холбоотой асуудлыг авч хэлэлцдэг юм байна.
19, 20-нд болж буй 24 дэх удаагийн дээд хэмжээний уулзалтын гол зорилго нь НАТО-гийн “Стратегийн шинэ үзэл баримтлал”-ыг хэлэлцэж батлах явдал юм.
11 дүгээр сарын 20-нд болохАфганистаны асуудлаарх Умард Атлантын зөвлөлийн дээд хэмжээний уулзалтадАфганистан дахь Энхийг дэмжих олон улсын хүчний ажиллагаанд цэрэг илгээгч, НАТО-гийн гишүүн бус орнуудын төр, засгийн тэргүүн нар оролцох юм. Уг уулзалтаар Афганистанд явуулж буй үйл ажиллагаа болон цаашид баримтлах бодлогын талаар хэлэлцэхээр төлөвлөөд байна.
Уулзалтаас “Афганистаны тунхаглал”, мөн оролцож буй нийт орны байр суурийг тусгасан “Хамтарсан мэдэгдэл” тус тус гарах аж.
Лисбоны дээд хэмжээний уулзалтад НАТО-гийн гишүүн 28 орон оролцож байна. Мөн НАТО, ОХУ-ын уулзалт энэ үеэр болох төлөвтэй байна. НАТО-гийн зүгээс Лисбоны дээд хэмжээний уулзалтад ихээхэн ач холбогдол өгч, улс төр, цэргийн шугамаар бүх бэлтгэлийг хангажээ.
Монгол Улсын Ерөнхийлөгч Афганистаны асуудлаарх НАТО-гийн дээд хэмжээний уулзалтад оролцохоор Лисбон хотноо хүрэлцэн ирлээ
