Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар Япон Улсын Цог Жавхлант Эзэн хаан Акихито, Эрхэм дээд хатан Мичико нарт бараалхлаа
Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар Япон Улсын Цог Жавхлант Эзэн хаан Акихито, Эрхэм дээд хатан Мичико нарт өнөөдөр бараалхлаа.
Ерөнхийлөгч Ц.Элбэгдорж Цог Жавхлант Эзэн хаантай уулзаж буйдаа баяртай байгаагаа илэрхийлж, Эзэн хаан болон японы ард түмэнд монголын ард түмний мэндчилгээг уламжлав. Мөн Монгол, Япон хоёр орон ойртон дотносож, ард түмний харилцан ойлголцол гүнзгийрч буйд баяртай байгаагаа илэрхийллээ.
Япон Улсад хийж буй энэ удаагийн айлчлалаар Монгол, Японы харилцаа хамтын ажиллагааг шинэ шатанд гарган хөгжүүлэх асуудлаар Ерөнхий сайд Н.Кантай санал солилцохоор төлөвлөж байгаагаа тэрээр дурдав.
Цог Жавхлант Эзэн хаан болон Эрхэм дээд Хатныг тааламжтай цагтаа Монгол улсад айлчлахыг урилаа.
Цог Жавхлант Эзэн хаан Монгол Улсын Ерөнхийлөгчийн айлчлалд амжилт хүсээд, айчлалын агуулга, тэргүүний технологи, байгаль цаг агаар, өвөлжилтийн тухай, мөн сумо бөхийн талаар сонирхон ярилцаж, Монгол оронд хөгжил цэцэглэлийг ерөөв.
Цог Жавхлант Эзэн хаан хаан ширээ залгамжлан авахдаа “Үргэлж ард түмэнтэйгээ хамт байж, Үндсэн Хуулийг ёсчлон сахина” гэж мэдэгджээ.
Хатан хаан Мичико нь Эзэн Хааны удмын хүнтэй гэр бүл болсон энгийн гаралтай анхны хүн бөгөөд утга зохиол, байгаль орчныг сонирхон судалдаг юм байна.
Үе залгамжлагч Хунтай Нарухито 2007 онд, Эрхэм дээд Ханхүү Акишинономия, гүнжийн хамт 2002 онд Монгол оронд тус тус айлчилж байсан билээ.
Уулзалтын дараа Япон Улсын Цог Жавхлант Эзэн хаан Акихито, Эрхэм дээд хатан Мичико нар Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нарыг хүндэтгэн зоог барив.
Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар Япон Улсын Цог Жавхлант Эзэн хаан Акихито, Эрхэм дээд хатан Мичико нарт бараалхлаа
