“Тэнгэрийн дуудлага” хөгжмийн наадам нээлтээ хийлээ
Монгол Улсын Ерөнхийлөгчийн ивээл дор зохиож буй монгол туургатны хөгжмийн зохиолчдын “Тэнгэрийн дуудлага” хөгжмийн наадмын нээлт улсын дуурь бүжгийн эрдмийн театрт 10 дугаар сарын 25-нд боллоо. Монголын хөгжмийн зохиолчдын холбооны ерөнхийлөгч, Дэлхийн монгол туургатны хөгжмийн зохиолчдын холбооны ерөнхийлөгч, Монгол Улсын урлагийн гавьяат зүтгэлтэн, хөгжмийн зохиолч Б.Бямбабаяр энэхүү наадмыг нээж үг хэлэхдээ “Монгол туургатны бүтээсэн ая эгшиг, баялаг дуу хөгжим сүүлийн 10 жилд сан хөмрөгөө далайцай арвижуулж, даяаршиж буй ертөнцөд та биднийг улам ойртуулан омог зоригийг бадрааж байна” хэмээн тэмдэглэв.
Нээлтийн ажиллагаанд Монгол Улсын Ерөнхийлөгчийн Тамгын газрын дарга Д.Баттулга оролцож, үг хэлж Монгол Улсын нийслэл Улаанбаатар хотноо “Тэнгэрийн дуудлага” олон улсын симфони шинэ хөгжмийн наадамд оролцогч зочдод талархал илэрхийллээ. Тэрээр цааш нь хэлэхдээ “Сэтгэлийн хөг”, “Зүрхний гал” болсон хөгжмийн урлаг хүн бүхэнд орчуулгагүйгээр ой тойнд нь буудаг шидийг олсноороо хамгийн түгээмэл, хамгийн нийтлэг, хамгийн хүчтэй урлагийн тоонд зүй ёсоор орох биз ээ. Гэлээ ч ахуй, соёл, уламжлал, ёс заншил, цаг улиралтайгаа сүлэлдэн үндэстэн угсаатан бүрийн хөгжим өөр өөрийн онцлогтой, сэтгэлгээний нийтлэг төрхийг илэрхийлдэг жамтай нь бас тодорхой. Тиймээс угсаа гарал нэгтэй хөгжмийн зохиолчид нэгэн цагт цугларан хөгжмийн бүтээлээ сонсоцгоох нь Төв Азийн цээжнээ эртнээс нүүдэллэн амьдарч ирсэн өвөг дээдсийнхээ ертөнцийг үзэх, тэнгэрийг дээдлэх ухаан бодол, оюун санаа хэнд маань хэрхэн уламжлагдаж, хөгжмийн яруу эгшгээр илэрхийлэгдэж байна вэ гэдгээ улам илүү ухаарахад тань сайхан боломж олдож байна хэмээн тэмдэглэсэн юм.
Мөн та бүхний бүтээсэн хөгжмийн сонин сайхан туурвил манай хөгжимчид, судлаачид сонсогчдын таашаалд хүрч, Монгол Улсын маань соёлын хөгжилд үнэтэй хувь нэмэр оруулна гэдэгт эргэлзэхгүй байна гэж тэрээр хэллээ.
Монголын хөгжмийн зохиолчдын холбооны ерөнхийлөгч Б.Бямбабаяр Урлагийн гавьяат зүтгэлтэн, хөгжмийн зохиолч С.Баатарсүхийн “Монголын нууц товчоо” симфони зохиолын эх бичлэгийг Ерөнхийлөгчийн Тамгын газрын дарга Д.Баттулгад гардуулав.
Хөгжмийн наадам энэ сарын 25-27-нд болох бөгөөд эхний өдөр Төрийн шагналт, урлагийн гавьяат зүтгэлтэн, хөгжмийн зохиолч Б.Шаравын “Тэнгэрийн орон”, Ардын жүжигчин, төрийн шагналт хөгжмийн зохиолч Ц.Намсрайжавын “Говь гурван сайхан”, Урлагийн гавьяат зүтгэлтэн, хөгжмийн зохиолч С.Баатарсүхийн “Монголын нууц товчоо”, Буриад улсын төрийн шагналт, урлагийн гавьяат зүтгэлтэн Баяр Дондоковын төгөлдөр хуур, симфони найрал хөгжмийн концертын нэгдүгээр анги, Өвөр Монголын өөртөө засах орны төлөөлөгч, СУИС-ийн хөгжмийн урлагийн сургуулийн оюутан Ү.Үндэсийн Чавхдаст хөгжмийн дөрвөл, Халимаг улсын урлагийн гавьяат зүтгэлтэн, Халимагийн төрийн дууллыг зохиогч, хөгжмийн зохиолч Аркадий Наминович Манджиевийн чавхдаст найрал хөгжимд зориулсан симфони, 2010 оныд Италийн Балоньи хотноо болсон Олон улсын хөгжмийн зохиолчдын XVI удаагийн уралдааны III байрын шагналт, СУИС-ийн багш, хөгжмийн зохиолч Ш.Өлзийбаярын төгөлдөр хуур, найрал хөгжимд зориулсан Вариаци токката, Төрийн шагналт хөгжмийн зохиолч Ц.Нацагдоржийн “Өргөөний баяр наадам” симфониудыг тоглож, үзэгч олныхоо сонорыг мялаалаа.
“Тэнгэрийн дуудлага” хөгжмийн наадам нээлтээ хийлээ
