МАН-ын Бага хурлаас Монгол Улсын Ерөнхий сайдад нэр дэвшүүлсэн УИХ-ын гишүүн Ж.Эрдэнэбатыг өчигдөр Монгол Улсын Ерөнхийлөгчтэй зөвшилцсөн билээ.
Тэгвэл өнөөдөр Монгол Улсын Ерөнхийлөгчийн Тамгын газрын дарга П.Цагаан УИХ-ын гишүүн Ж.Эрдэнэбатыг Монгол Улсын Ерөнхий сайдад нэр дэвшүүлсэн тухай асуудлыг УИХ-ын даргад өргөн барилаа.
Жаргалтулга овогтой Эрдэнэбат 1974 оны 07 дугаар сарын 17-нд Сэлэнгэ аймгийн Мандал суманд төрсөн. Ам бүл 5.
Ж.Эрдэнэбат нь 1991 онд Сэлэнэ аймгийн Мандал сумын 10 жилийн дунд сургууль, 1995 онд Худалдаа, үйлдвэрлэлийн дээд сургууль, 1998 онд Монголын мэргэшсэн нягтлан бодогчдын институт, 2004 онд Удирдлагын академи, 2005 онд Хөдөө аж ахуйн их сургууль тус төгссөн. Эдийн засагч мэргэжилтй, Эдийн засгийн ухааны магистр.
Ерөнхий сайдад нэр дэвшигч Ж.Эрдэнэбат нь Сэлэнгэ аймгийн Мандал сумын “Сүүтэй” ХХК-д нягтлан бодогч, Сэлэнгэ аймгийн Хянан шалгах хороонд байцаагч, Сэлэнгэ аймгийн Засаг даргын Тамгын газрын Санхүү, эдийн засгийн бодлого зохицуулалтын хэлтсийн дарга, Санхүү, төрийн сангийн хэлтсийн дарга, Засаг даргын орлогч, Засаг дарга, Монгол Улсын Сангийн сайдаар ажиллаж байсан.
Ж.Эрдэнэбат УИХ-ын гишүүнээр хоёр удаа сонгогдсон. Монгол Ардын намын Удирдах зөвлөлийн гишүүн, Бага хурлын гишүүн. Аймгийн МАН-ын хорооны даргын сонгуульт ажилтай. Санхүү, банкны тэргүүний ажилтан, Биеийн тамир спортын тэргүүний ажилтан, Их Монгол Улс байгуулагдсаны 800 жилийн ойн хүндэт медаль, Хөдөлмөрийн хүндэт медаль, Алтан гадас одонгоор шагнагдсан.
Тэрээр парламентын болон төрийн албаны туршлагатай, өндөр боловсролтой, манай тэргүүний боловсон хүчний нэг учир Монгол Улсын Ерөнхий сайдын албыг нэр төртэйгөөр гүйцэтгэж чадна гэж МАН үзсэн байна.
