Монгол Улсын Ерөнхийлөгчөөс санаачлан боловсруулсан Үндэсний аюулгүй байдлын тухай, Монгол Улсын батлан хамгаалах тухай, Зэвсэгт хүчний тухай, Цэргийн албаны тухай, Цэргийн алба хаагчийн эрх зүйн байдлын тухай, Төрийн болон албаны нууцын тухай, Мэдээллийн аюулгүй байдлын тухай хуулийн төслийг Ерөнхийлөгчийн Хүний эрх, хуулийн бодлогын зөвлөх Ч.Өнөрбаяр өнөөдөр Улсын Их Хурлын даргад өргөн мэдүүллээ.
Үндэсний аюулгүй байдлын тухай хуулийн төсөл: Үндэсний аюулгүй байдлыг хангах үйл ажиллагааны тогтолцоог боловсронгуй болгож, ялангуяа үндэсний аюулгүй байдлыг хангах тусгайлсан чиг үүрэгтэй байгууллагуудын харилцан ажиллагаа, зохицуулалтыг сайжруулах чиглэлтэй.
Монгол Улсын батлан хамгаалах тухай хуулийн төсөл: Батлан хамгаалах тогтолцооны үндэс нь төр захиргааны байгууллагууд, нийт иргэдийн оролцоонд тулгуурласан орон нутгийн хамгаалалт, мэргэжлийн цэрэгт суурилсан зэвсэгт хүчин, нэгдмэл удирдлага, төлөвлөлт бүхий дайчилгаа байхаар шинээр тодорхойлсон байна.
Зэвсэгт хүчний тухай хуулийн төсөл: Зэвсэгт хүчний гүйцэтгэх үүрэг, түүнийг хэрэглэх онол арга зүйд гарч буй сүүлийн үеийн өөрчлөлт, мэргэжлийн цэрэгт суурилсан чадварлаг болгох чиглэлээр Зэвсэгт хүчнийг хөгжүүлэх бодлогыг хэрэгжүүлэх эрх зүйн үндсийг бүрдүүлэхэд чиглэсэн.
Цэргийн албаны тухай хуулийн төсөл: Монгол Улсын иргэний цэргийн үүргийг тодорхой заасан, хугацаат болон цэргийн гэрээт алба, цэргийн дүйцүүлэх албатай холбогдох харилцааг нарийвчлан тогтоосон ба нэн шаардлагатай нарийн мэргэжил бүхий хүмүүсийг цэргийн гэрээт албанд элсүүлэх эрх зүйн үндэслэлийг бүрдүүлж, цэргийн сургуулийн сонсогчийн цэргийн сургуульд суралцсан хугацааг иргэний ажилласан, цэргийн алба хаагчийн тэтгэвэр тогтоох хугацаанд оруулан тооцох, “Оюутан цэрэг”-тэй холбоотой эрх зүйн үндэслэлийг бий болгосон.
Цэргийн алба хаагчийн эрх зүйн байдлын тухай хуулийн төсөл: Цэргийн жинхэнэ алба хаагчийн эрх зүйн байдал, үүргээ гүйцэтгэх нөхцөл баталгаа, эрхийн хязгаарлалттай холбогдох харилцааг зохицуулахад чиглэсэн.
Төрийн болон албаны нууцын тухай хуулийн төсөл: Төрийн болон албаны нууцын асуудлыг шинэ зарчим, хандлагаар авч үзэн Төрийн нууцын тухай болон Төрийн нууцын жагсаалт батлах тухай хуулийг нэгтгэн төрийн болон албаны нууцад хамаарах мэдээллүүд, байгууллага, албан тушаалтны бүрэн эрхийг тодорхой хуульчлах, мэдээллийг нууцлах, ил болгох оновчтой зохицуулалтыг бий болгох, иргэний мэдээлэл авах эрхийг хангах, төрийн болон албаны нууцыг хамгаалах олон талт арга хэмжээг бүрэн тусгах, нууц хамгаалалд тавих хяналт, хууль тогтоомж зөрчигчид хүлээлгэх хариуцлагыг боловсронгуй болгох чиглэлтэй.
Мэдээллийн аюулгүй байдлын тухай хуулийн төсөл: Мэдээллийн аюулгүй байдлыг хангахад байгууллага, иргэний оролцоо, тэдгээрийн эрх, үүрэг, хариуцлагын асуудал тодорхой болж, мэдээлийн аюулгүй байдлыг хангах үйл ажиллагаа хэрэгжих баталгаа бүрдэхэд чиглэсэн.
