Монгол Улсын Ерөнхийлөгч Ц.Элбэгдорж Бүгд Найрамдах Франц Улсад албан ёсны айлчлал хийхээр өчигдөр орой Улаанбаатараас мордсон билээ. Монгол Улс дахь Франц Улсын Элчин сайдын яамнаас өчигдөр уг айлчлалыг хийхийг онцгойлон сайшааж Монгол Улсын Гадаад хэргийн яаманд ноот бичиг ирүүлсэн байна.
Уг ноот бичигт “Өнгөрсөн баасан гаригт Парист үйлдэгдсэн эмгэнэлт зэвсэгт халдлагын улмаас Монгол Улсын Ерөнхийлөгч Ц.Элбэгдоржийн Францад хйих айлчлал түр хугацаагаар хойшилсон. Бүгд Найрамдах Франц Улсын Ерөнхийлөгчийн ажлын алба 11 дүгээр сарын 18-ны Лхагва гаригаас эхлэхээр тогтсон Монгол Улсын Ерөнхийлөгчийн албан ёсны айлчлалыг төлөвлөсний дагуу хийхийг хүсч буйг тус ЭСЯ Монгол Улсын Гадаад хэргийн яаманд албан ёсоор мэдэгдье.
Энэхүү айлчлал нь Бүгд Найрамдах Франц Улс, Монгол Улсын хоорондын харилцааны 50 жилийн ойн чухал үе болон Франц Улсад тохиолдоод буй хүнд бэрх үед ардчилсан Монгол Улсын Төрийн тэргүүн хүрэлцэн очих нь тод томруун дэмжлэг, эв нэгдлийн илэрхийлэл болох тул Бүгд Найрамдах Франц Улс онцгойлон сайшаах болно” гэжээ.
