Ерөнхийлөгч Ц.Элбэгдорж орчин үеийн дэвшилтэт технологи бүхий үйлдвэрүүдтэй танилцав
Дани улс 1980-аад он хүртэл эрчим хүчний эх үүсвэрээ 100 хувь импортоор авдаг байсан бол өнөөдөр хэрэгцээнийхээ дийлэнхийг өөрсдөө хангадаг болжээ. Байгальд ээлтэй цэвэр технологиор эрчим хүч үйлдвэрлэж байгаа компануудын нэг нь Копенгаген хотоос холгүй оршдог “Авердор” цахилгаан станц юм. Монгол Улсын Ерөнхийлөгч Ц.Элбэгдорж айлчлалынхаа үеэр Данийн Вант Улсын сэргээгдэх эрчим хүч, байгальд ээлтэй технологийн үлгэр жишээ болсон тус станцтай танилцлаа.
“Авердор” цахилгаан станц 2002 онд ашиглалтад орсноор нүүрсээр ажиллаж байсан гурван цахилгаан станц хаагдаж, агаарт ялгардаг нүүрстөрөгчийн давхар исэл 10 хувь, азотын исэл 20 хувь, хүхрийн давхар исэл 30 хувь буурчээ. Тус станц Копенгаген хот болон түүний орчмын 180 мянган өрхийг дулаанаар, 800 мянган өрхийг цахилгаанаар хангаад зогсохгүй Швед улсад эрчим хүч нийлүүлдэг аж.
1996 оноос эхлэн Дани Улсад нүүрс түлэхийг хориглосон байна. “Авердор” үйлдвэр байгалийн хийнээс гадна сүрэл, модны үртсээр хийсэн биомасс хэрэглэж байна.
Ерөнхийлөгчийн танилцсан өөр нэг үйлдвэр болох Слагелсе хотын “Арла” сүүний үйлдвэр мөн салбарынхаа хамгийн дэвшилтэт технологийг ашиглаж байна.
Дани, Швед, Финланд болон Балтийн улсуудад 13 салбартай, 20 улсад бүтээгдэхүүнээ нийлүүлдэг тус үйлдвэр 16 мянган ажилтантай Данийн томоохон үйлдвэрлэгч, ажил олгогч юм.
Тус компанийг анх сүүний үйлдвэрлэлийн чиглэлийн фермерүүд нэгдэн байгуулжээ. Сүүг цуглуулах, тээвэрлэх боловсруулах түгээх зэрэг үйлдвэрлэлийн бүх шат дамжлагыг хамарсан тогтолцоог бий болгож чадсан байна. Дани Улс нь сүү, сүүн бүтээгдэхүүн, махны чиглэлийн бүтээгдэхүүн үйлдвэрлэлээр Европт тэргүүлэгч улсуудын нэг юм. 5 сая хүнтэй Дани Улс 20 сая хүн амыг хангах хэмжээний хүнсний бүтээгдэхүүнийг жилд үйлдвэрлэж экспортод гаргаж байгаагийн дийлэнх нь фермерийн аж ахуйн гаралтай бүтээгдэхүүн.
Монгол Улсын Ерөнхийлөгчийг дагалдан яваа Хүнс, хөдөө аж ахуй, хөнгөн үйлдвэрийн сайд Т. Бадамжунай болон тус яамны мэргэжлийн хүмүүс сүүний фермерийн аж ахуйн тогтолцоо, уг салбар дахь хоршооллын хэлбэрийн тухай дэлгэрэнгүй ярилцаж, Монгол Улсад хэрэгжүүлэх боломжийн талаар ярилцав.
Монгол Улсын Ерөнхийлөгчийн айлчлалын багийн бизнесийн төлөөлөл дээрх үйлдвэрүүд хэрхэн байгальд ээлтэй шинэ технологи ашиглаж буйтай танилцаж, ижил төрлийн үйлдвэрүүдтэй ажил хэргийн холбоо тогтоох тухай яриа өрнүүлж байлаа.
Ерөнхийлөгч Ц.Элбэгдорж орчин үеийн дэвшилтэт технологи бүхий үйлдвэрүүдтэй танилцав
