Захиргааны шүүхийн даргатай уулзав
Монгол Улсын Ерөнхийлөгч Ц.Элбэгдорж, Бүгд Найрамдах Финланд Улсын Захиргааны шүүхийн дарга Пекка Халлбергийг хүлээн авч уулзлаа.
Ноён П.Халлберг 1993 оноос хойш захиргааны шүүхийг даргалж байна. Тэрээр захиргааны эрх зүй, хүний эрх, Финландын Захиргааны дээд шүүхийн шийдвэрүүдийн талаар олон ном өгүүлэл бичсэн, энэ салбартаа нэр хүндтэй хуульч ажээ.
Финланд Улс нь Монгол Улстай төстэй хууль эрх зүйн тогтолцоотой боловч ялгаатай зүйл бас бий. Тухайлбал тус улсад Үндсэн хуулийн цэц гэж байдаггүй, харин парламентад Үндсэн хуулийн байнгын хороо ажилладаг тухай ноён П.Халлберг танилцуулав.
Аливаа хууль, түүний дотор Үндсэн хууль нь зөвхөн онол төдий биш, харин жирийн иргэдэд хүртээмжтэй, ойлгомжтой, өдөр тутмын амьдралд нь хэрэглэгддэг байх ёстой гэсэн байр сууриа тэрээр илэрхийллээ.
Ерөнхийлөгч Ц.Элбэгдорж хэрэгжүүлж буй тулгуур бодлогуудын нь нэг шүүхийг шинэчлэхэд чиглэж байгаа тухай ярьж, шүүхийн хараат бус бие даасан байдлыг хэрхэн хангах талаар санал солилцов.
Захиргааны шүүх болон хуулийн онолын асуудлаар дэлхийн олон улсад урилгаар ажилладаг ноён П.Халлбергийг Монгол Улсад зочилж, туршлагаасаа хуваалцахыг Монгол Улсын Ерөнхийлөгч санал болголоо.
Захиргааны шүүхийн даргатай уулзав
