Монгол Улсын Ерөнхийлөгчийн Финланд дахь айлчлал эхэллээ
Бүгд Найрамдах Финланд Улсын Ерөнхийлөгч хатагтай Таръя Халонены урилгаар тус улсад айлчилж буй Монгол Улсын Ерөнхийлөгч Ц.Элбэгдорж болон түүнийг дагалдан яваа төлөөлөгчдийг албан ёсоор угтах ёслол Финланд Улсын Ерөнхийлөгчийн ордонд 10-р сарын 6-ны өдөр боллоо.
Угтах ёслолын дараа Монгол Улсын Ерөнхийлөгч Ц.Элбэгдорж, , Финланд Улсын Ерөнхийлөгч хатагтай Т.Хэлонен нар ганцаарчилсан уулзалт хийж, үүний дараа хоёр тал өргөтгөсөн хэлэлцээ хийв.
Финландын Ерөнхийлагч хатагтай Т.Халонен хэлэхдээ анх удаа Монгол Улсын Ерөнхийлөгч, Төрийн тэргүүний түвшинд Хойд Европын орнуудад хийж буй айлчлалаа Финланд Улсаас эхэлж буйд талархаж байгаагаа илэрхийлэв. Монгол Улсын Ерөнхийлөгчийн энэ удаагийн айлчлал нь “түүхэн айлчлал болж байна” хэмээн тэрээр онцлон тэмдэглэсэн юм. Ерөнхийлөгч Т.Халонен “ Монгол Улс бол дэлхий дахинаа ардчиллын сайн жишээ болсон улс. Бид Монголын ардчиллын түүхэн замналыг бахархан сайшааж байна. Өнгөрсөн жил манай улсад Монгол Улсын Элчин сайдын яам нээгдсэн нь бидний харилцаа хамтын ажиллагааг өргөжүүлэх сайхан боломж нээгдлээ” гээд Монгол Улстай улс төр, эдийн засаг, соёл боловсролын салбарт бүхий л талаар хамтран ажиллахад бэлэн байгаагаа илэрхийллээ.
Тэрээр , манай улстай хөдөө аж ахуйн салбарт хамтрах, түүний дотор ойжуулалтын чиглэлээр тэргүүний технологи шилжүүлэх асуудлаар хамтран ажиллах боломжтой тухай ярилаа. Түүнчлэн шинжлэх ухааны болон боловсролын салбарт хоёр талын харилцаа, хамтын ажиллагааг өргөжүүлэх сонирхолтой байгаагаа илэрхийлэв.
Монгол Улсын Ерөнхийлөгч Ц.Элбэгдорж, Финланд Улс нь монголын төлөөлөгчдийг халуун дотноор хүлээн авч байгаад талархлаа илэрхийлээд, хүмүүнлэг ардчилсан, хүний эрхийг дээдэлсэн нийгмийг төлөвшүүлж байгаа манай улсын хувьд үлгэр жишээ авах орны нэг нь Финланд Улс гэдгийг хэллээ. Финланд Улс нь 1990- ээд он хүртэл манай улсын тэргүүлэх өрнөдийн түншүүдийн нэг байсан. Энэ харилцааг харилцан ашигтай байдлаар сэргээх сонирхолтой байгаагаа Ерөнхийлөгч Ц.Элбэгдорж илэрхийлсэн. Ялангуяа хөдөө аж ахуй, ойн салбарт хамтран ажиллах боломж өргөн байгааг онцлон дурдлаа. Финланд Улс нь ойн аж ахуй эрхлэлт, модны боловсруулалтаараа дэлхийд тэргүүлдэг бөгөөд нөөцөө хэвээр хадгалах, ой модоо зөв зохистой ашиглах, модыг дахин боловсруулж олон төрлийн бүтээгдэхүүн үйлдвэрлэлтээрээ дэлхийд тэргүүлдэг билээ. Иймээс дэлхийд тэргүүлэх ойн менежмент, технологийг Монголд нэвтрүүлэх хүсэлтийг тавив. Финландын тал энэхүү хүсэлтийг хүлээн авлаа.
Ерөнхийлөгч Т.Халонен, Монгол Улсын Ерөнхийлөгчид цаазаар авах ялд хориг тавьсан явдалд нь баяр хүргээд, орчин үед аль ч нийгэмд хүний амь хороох шийтгэл байх ёсгүй гэлээ.
Хэлэлцээрийн үеэр хоёр тал Европын Холбоо, НҮБ болон бусад олон талт хамтын ажиллагаанд хамтрах асуудлаар санал солилцлоо. Монгол Улс, Финланд Улсыг НҮБ-ын Аюулгүйн Зөвлөлийн байнгын бус гишүүний сонгуульд дэмжихэд бэлэн байгаагаа илэрхийлэв.
Мөн хоёр тал энхийг сахиулах ажиллагаанд хамтын ажиллагааг эрчимжүүлэхээр тохиролцов.
Ирэх жил Монгол Улсад, анхны төрт улс буюу Хүннү гүрэн байгуулагдсаны 2200, Үндэсний Эрх чөлөөний хувьсгалын 100 жилийн ой тохиох бөгөөд Ерөнхийлөгч Т.Халоненыг энэхүү түүхт их ойнуудыг тохиолдуулан Монгол Улсад айлчлахыг Ерөнхийлөгч Ц.Элбэгдорж урилаа. Хатагтай Т.Халонен энэхүү урилгыг талархан хүлээж авав.
Уулзалт хэлэлцээрт монголын талаас Гадаад Харилцааны сайд Г.Занданшатар, ХХААХҮ-ийн сайд Т.Бадамжунай, УИХ-ын гишүүн С.Бямбацогт,.Э.Мөнх-Очир, БСШУ-ны дэд сайд Ч.Куланда нар оролцов.
Бүгд Найрамдах Финланд Улсын талаас Гадаад Худалдаа хөгжлийн сайд П.К.Хелла, Төрийн нарийн бичгийн дарга П.Торстила, Финланд Улсаас Монгол Улсад суугаа Элчин сайд Л.Бэкстрүм, ГХЯ-ны Ази Номхон далайн хэлтсийн захирал Ёохан Шалин болон албаны бусад хүмүүс оролцов.
Хоёр талын өргөтгөсөн хэлэлцээрийн дараа Ерөнхийлөгч нар айлчлалын талаар мэдээлэл хийж, сэтгүүлчдийн асуултад хариуллаа.
Финландын өдөр тутмын сонин болон үндэсний телевиз Монгол Улсын Ерөнхийлөгчөөс , Монгол орны хөгжлийн боломж, эдийн засгийн өсөлт түүнд нөлөөлөх уул уурхайн салбарын нөлөөллийн талаар , мөн Ерөнхийлөгчийн хэрэгжүүлж байгаа бодлогын талаар асууж сонирхож байв.
Монгол Улсын Ерөнхийлөгчийн Финланд дахь айлчлал эхэллээ
