Энэ сарын 16, 17-ны өдрүүдэд болсон байгалийн гамшгийн улмаас олон хүний амь нас сүйрч, олон айл өрхөд нөхөж баршгүй гарз хохирол учирсанд Монгол Улсын Ерөнхийлөгч Ц.Элбэгдорж эмгэнэл илэрхийллээ.
Ерөнхийлөгч, олон нийтийн хэвлэл мэдээллийн хэрэгсээр дамжуулан ард түмэндээ хандаж хэлсэн үгэндээ:
“Говь-Алтай аймаг болон нийслэл Улаанбаатар хотод орсон хүчтэй аадар бороо, үерийн улмаас эрдэнэт хүний амь нас сүйрч, олон айл өрхөд хүнд гарз учирсан гүнээ харамсан эмгэнэж байна. Гамшгийн дараах нөхөн сэргээх ажлыг манай улсын Засгийн газар цаг алдалгүй яаралтай авч хэрэгжүүлж байгаа тухай мэдээллийг би авч байна.
Энэ үер усны аюул биднийг цааш цаашдаа сэрэмж, болгоомжтой байхыг санууллаа. Ойрын үед болзошгүй үер усны аюулын тухай цаг агаарын мэдээ ирсээр байгаа тул ард иргэд та бүхэн сэрэмжтэй байж, албан байгууллага, орон нутгийн удирдлагууд оногдсон үүрэгт ажлаа шуурхай гүйцэтгэх хэрэгтэй гэдгийг дахин сануулья” гэлээ.
