Эрхэм хүндэт наадамчид аа
Дэлхий дэлэгнэсэн, тэнгэр ивэлсэн дэлгэр зуны энэ удаагийн баяр наадам маань өөрийн өнгө төрх, өвөрмөц давтагдашгүй шинж, бахархалт амжилтаараа өөрийн түүхээ тод бичиж чадлаа.
Монгол түмэн минь түүх уламжлал, ёс заншлаа дээдэлж, Монгол наадам болсон газар бүр хүчтэнээс хүчтэн, хурднаас хурдан, цэцнээс цэцэн алдар суугаа дуурсгаж түмэн олноо баярлууллаа.
Өндөрлөж буй энэ наадам Монгол хүн бүрт хийж бүтээх шинэ эрч хүч, урам зориг хайрласан нь гарцаагүй. Дараа жилийн наадам хол мэт санагдавч төр засаг, ард иргэд Та бидний өмнө цаг алдалгүй шийдвэрлэх шаардлагатай олон асуудлууд байна.
Улс орныг бүхэлд нь хамарсан улс төрийн кампанит ажил болох нийтийн сонгуульгүй 2 жилийн нэг нь энэ наадмын маргаашнаас эхэлнэ. Улс орондоо шударга ёс тогтоох, ард иргэд нийтээрээ аж амьдралаа дээшлүүлэх, эх орныхоо хөгжил дэвшилд дорвитой ахиц авч ирэхүйц далайцтай бодлого, үйл ажиллагаа Та биднийг хүлээж байна.
Улс нийтээрээ хөгжин дэвших их зорилгод нэгдэж, Монгол Монголоо дэмжин, хамтаараа урагшлахын ерөөл өргөж наадмын ажиллагаа өндөрлөж байгааг уламжлая.
