Иргэний танхимд олон улсын бага хурал болно
Монгол Улсын Ерөнхийлөгчийн тамгын газар нь 2010 оны 9 дүгээр сарын 30-нд болох “Инноваци ба технологийн бодлого, хөгжлийн чиг хандлага” сэдэвт олон улсын бага хурлын ерөнхий зохион байгуулагч бөгөөд энэхүү арга хэмжээ нь Монгол Улсын Ерөнхийлөгчийн мөрийн хөтөлбөр, шинжлэх ухаан, технологийг 2007-2020 онд хөгжүүлэх мастер төлөвлөгөө зэрэг төр, засгийн бодлогын баримт бичгүүдийг цаг алдалгүй хэрэгжүүлэхэд ач холбогдолтой хэмээн үзэж байгаа юм.
Монгол Улсын тогтвортой хөгжлийн нэн чухал хүчин зүйл шинжлэх ухаан, технологи, инноваци, бизнес, санхүүгийн салбарын үйл ажиллагааны уялдаа холбоог сайтар хангах нь туйлын чухал болж байна. Инновацийг хөхиүлэн дэмжиж, шинжлэх ухааны эрдэм шинжилгээ, судалгааны ажлыг үйлдвэржүүлэлт, бизнес хөгжлийн үйлчилгээ, инкубаци, санхүүжилтийн шинэ арга хэрэгсэл, механизмтай холбож өгөх нь эдийн засгийн эргэлтийг хурдасгаж, санхүүгийн салбарт ч үсрэнгүй ахиц гарах өндөр магадлалтай юм.
Монгол Улс дэлхийн шилдэг, хамгийн үр ашигтай технологийг өөрийн оронд оруулахын зэрэгцээ улс орнуудын технологийн талаар мэдээлэл сайтай байж, өөрийнхийгөө бусдад түгээж, үнэлүүлэн арилжаанд оруулах нь ганц газрын доорхи баялгийн хүчинд дулдуйдах бус эдийн засгаа төрөлжүүлэн үр ашгийг нь нэмэгдүүлэх, бүтээмжийг өсгөх, өрсөлдөх чадвараа дээшлүүлэх замаар хөгжих боломж бололцоог нээж өгнө.
Иймээс M-ICP инноваци, технологи хөгжлийн компани санаачилж, Үндэсний хөгжил, шинэтгэлийн хороо, Боловсрол, соёл, шинжлэх ухааны яам, Шинжлэх ухааны академи, Монголын бизнес инкубаторуудын үндэсний нэгдсэн холбоо, Эдийн засгийн бодлого, өрсөлдөх чадварын судалгааны төв зэрэг төрийн болон төрийн бус байгууллагууд дэмжиж буй уг бага хуралд Ерөнхийлөгчийн Тамгын газар ихээхэн ач холбогдол өгч байгаа билээ.
Бага хуралд олон улсын түвшинд үйл ажиллагаа явуулдаг нэр хүнд бүхий АНУ-ын М-САМ компанийн ерөнхий захирал доктор Давид Мартин, тус компанийн ерөнхийлөгч Давид Пратт нар уригдан оролцоно.
Иргэний танхимд олон улсын бага хурал болно
