Кувейт Улсаас суурин суух анхны Элчин сайд итгэмжлэх жуух бичгээ барив
Кувейт Улсаас Монгол Улсад суух Онц бөгөөд Бүрэн эрхт Элчин сайд ноён Мубарак Мохамед Фалех Аль Сехайжан өнөөдөр Монгол Улсын Ерөнхийлөгч Ц.Элбэгдоржид итгэмжлэх жуух бичгээ өргөн барилаа.
Монгол Кувейт улс харилцан Элчин сайдын яамаа нээж ажиллуулах шийдвэр 2009 оноос биелэлээ олж ийнхүү Эрхэмсэг ноён Мубарак Аль Сехайжан Улаанбаатар хотод байнга оршин сууж ажиллахаар болж байна.
Итгэмжлэх жуух бичгээ барьсантай нь холбогдуулж хүлээн авч уулзахдаа Ерөнхийлөгч, Элчин сайдад Монгол, Кувейтын хоорондох сайн харилцаа, хамтын ажиллагааг улам бүр хөгжүүлэхийн төлөө амжилттай ажиллахыг хүсэн ерөөлөө.
“Манай хоёр улс аль аль талдаа харилцан Элчин сайдын яамаа нээсэн нь харилцааг бэхжүүлэхэд чухал ач холбогдолтой болж байна. Кувейт улс, Монгол Улсын дэд бүтцийн салбарт чухал ач холбогдолтой төслүүдэд оролцож хувь нэмрээ оруулж байгаад бид талархаж байдаг. Кувейт Улсаас Монгол Улсад газрын тос экспортлох тухай нэгэнт эхэлсэн яриа хэлэлцээг ажил хэрэг болгох талаар эрхэм Элчин сайд та анхаарал тавьж дэмжлэг үзүүлэн ажиллана гэдэгт итгэж байна. Монгол Улсын Засгийн газар, Монгол-Кувейтын Засгийн газар хоорондын комисс байгуулахыг тууштай дэмжиж байгааг тэмдэглэн хэлье” хэмээн Ерөнхийлөгч ярив.
Элчин сайд Мубарак Мохамед Фалех Аль Сехайжан Монгол Улсын Ерөнхийлөгчид талархал илэрхийлээд, хоёр орны харилцаа хамтын ажиллагааг улам бүр өргөжүүлэн хөгжүүлэхийн төлөө хүчин зүтгэл гаргаж ажиллах болно гэлээ.
Энэ жил Монгол Улс, Кувейт Улсын хооронд дипломат харилцаа тогтоосны 35 жилийн ой тохиож байгаа билээ. Кувейтын сан нь 1996 оноос хойш манай улсын зам, усан цахилгаан станцын бүтээн байгуулалтад нийт 79 орчим сая долларын зээл олгоод байна.
Кувейт Улсаас суурин суух анхны Элчин сайд итгэмжлэх жуух бичгээ барив
