Монгол Улсын Ерөнхийлөгч Шинэ хичээлийн жилийн баярын мэндчилгээ дэвшүүлэв
Монгол Улсын Ерөнхийлөгч Цахиагийн Элбэгдорж 2010-2011 оны хичээлийн шинэ жилийн нээлтийг тохиолдуулан Нийслэлийн Баянгол дүүргийн 28 дугаар сургуулийн Эрдмийн баярт оролцов.
Эхлээд, тус сургуулийн захирал В.Доржготов нийт багш, сурагчид, эцэг эхчүүдэд эрдмийн баярын мэнд дэвшүүлээд Монгол Улсын Ерөнхийлөгч тус сургуулийн хичээлийн шинэ жилийн нээлтэд хүрэлцэн ирсэнд талархал илэрхийлсэн юм.
Энэ үеэр Монгол Улсын Ерөнхийлөгч Ц.Элбэгдорж хэлсэн үгэндээ, “Есдүгээр сарын 1 бол сурагч, багш, эцэг эхчүүд гээд ер нь хүн бүрийн хүсэн хүлээдэг гэгээлэг сайхан өдөр юм. Шинэ хичээлийн жил эхэлж буй энэ мөчид, орон даяар 50 гаруй мянган балчир үрс маань анх удаа сургуулийн босгыг алхаж байна. Энэ хичээлийн жилд боловсролын салбарт олон сайн шинэчлэл гарч, төр засгийн зүгээс ч тус салбарт томоохон дэмжлэг үзүүлж ажиллана” гэлээ.
Мөн Ерөнхийлөгч, монгол орныхоо өнцөг булан бүрт эрдмийн баяраа тэмдэглэж буй нийт хүүхэд багачууд, багш сурган хүмүүжүүлэгчид, оюутан, өсвөр үеийнхэн болон эцэг эхчүүдэд зориулан хичээлийн шинэ жилийн баярын мэндчилгээ дэвшүүлэв.
Дараа нь Монгол Улсын Ерөнхийлөгч тус сургуулийн үйл ажиллагаа, сурагчдын гар урлалын үзэсгэлэнтэй танилцав. БГД-ийн 28 дугаар сургууль нь 46 дахь жилийнхээ эрдмийн баярыг тэмдэглэж буй бөгөөд энэ жил 2455 сурагчтайгаас 222 хүүхэд шинээр нэгдүгээр ангид элсч байгаа юм байна.
Монгол Улсын Ерөнхийлөгч Шинэ хичээлийн жилийн баярын мэндчилгээ дэвшүүлэв
